‘ಇಟ್ಲು ಅರ್ಜುನ’: ತೆಲುಗು ರೊಮ್ಯಾಂಟಿಕ್ ಥ್ರಿಲ್ಲರ್
ಹೈದರಾಬಾದ್: ಅನೀಶ್ ಮತ್ತು ಅನಸ್ವರ ರಾಜನ್ ಅಭಿನಯದ ತೆಲುಗು ಚಿತ್ರ ‘ಇಟ್ಲು ಅರ್ಜುನ’ ಟ್ರೇಲರ್ ಅನ್ನು ನಟ ಜೂನಿಯರ್ ಎನ್‌ಟಿಆರ್ ಬಿಡುಗಡೆ ಮಾಡಿದ್ದಾರೆ. ಮಹೇಶ್ ಉಪ್ಪಾಲ ನಿರ್ದೇಶನದ ಈ ಚಿತ್ರ ನವೆಂಬರ್ 13ರಂದು ವಿಶ್ವದಾದ್ಯಂತ ಬಿಡುಗಡೆಯಾಗಲಿದೆ.
ಚಿತ್ರದಲ್ಲಿ ಮಾತು ಬಾರದ ಅರ್ಜುನ್ ಪಾತ್ರದಲ್ಲಿ ಅನೀಶ್ ಕಾಣಿಸಿಕೊಂಡಿದ್ದಾರೆ. ಕಳ್ಳತನದಲ್ಲಿ ಪರಿಣತಿ ಹೊಂದಿರುವ ಆತನ ಮೇಲೆ ದರೋಡೆ ಪ್ರಕರಣದ ಶಂಕೆ ವ್ಯಕ್ತವಾಗುತ್ತದೆ. ₹1,000 ಕೋಟಿ ಮೌಲ್ಯದ ಪೆನ್‌ಡ್ರೈವ್‌ಗಾಗಿ ಹುಡುಕುತ್ತಿರುವ ಗ್ಯಾಂಗ್ ಹಾಗೂ ಪೊಲೀಸರಿಂದ ಅರ್ಜುನ್ ಮತ್ತು ಆತನ ಗೆಳತಿ ಕೀರ್ತಿ (ಅನಸ್ವರ ರಾಜನ್) ಎದುರಿಸುವ ಸವಾಲುಗಳು ಚಿತ್ರದ ಕಥೆಯ ಪ್ರಮುಖ ಅಂಶಗಳಾಗಿವೆ.
ಅನೀಶ್ ಅಭಿನಯವನ್ನು ಜೂನಿಯರ್ ಎನ್‌ಟಿಆರ್ ಮೆಚ್ಚಿಕೊಂಡಿದ್ದಾರೆ. ನಾಯಕನಾಗಿ ಅನೀಶ್ ಮತ್ತು ನಿರ್ದೇಶಕರಾಗಿ ಮಹೇಶ್ ಉಪ್ಪಾಲ ಅವರಿಗೆ ಇದು ಮೊದಲ ಚಿತ್ರ.
ವೆಂಕಿ ಕುಡುಮುಲ ಅವರ ನಿರ್ಮಾಣದಲ್ಲಿ ಮೂಡಿಬಂದಿರುವ ಚಿತ್ರಕ್ಕೆ ನಾಗಾರ್ಜುನ ಪ್ರಸ್ತುತಿಕಾರರಾಗಿದ್ದಾರೆ. ಎಸ್. ಥಮನ್ ಸಂಗೀತ ಸಂಯೋಜಿಸಿದ್ದು, ರಾಜಾ ಮಹದೇವ್ ಛಾಯಾಗ್ರಹಣ ನಿರ್ವಹಿಸಿದ್ದಾರೆ. ಅಕ್ಟೋಬರ್ 30ರಂದು ಬಿಡುಗಡೆಯಾಗಬೇಕಿದ್ದ ಚಿತ್ರ ಮುಂದೂಡಿಕೆಯಾಗಿತ್ತು.
