MAITREE-XV ಜಂಟಿ ಸೇನಾ ಕವಾಯತು: ಥೈಲ್ಯಾಂಡ್ಗೆ ಭಾರತೀಯ ಸೇನಾ ತುಕಡಿ
ನವದೆಹಲಿ: 15ನೇ ಭಾರತ–ಥೈಲ್ಯಾಂಡ್ ಜಂಟಿ ಸೇನಾ ಕವಾಯತು MAITREE-XV (2026) ನಲ್ಲಿ ಭಾಗವಹಿಸಲು ಭಾರತೀಯ ಸೇನಾ ತುಕಡಿ ಸೋಮವಾರ ಥೈಲ್ಯಾಂಡ್ಗೆ ತೆರಳಿದೆ.
ಆಗಸ್ಟ್ 18ರಿಂದ 31ರವರೆಗೆ ಥೈಲ್ಯಾಂಡ್ನ ಸೂರತ್ ಥಾನಿಯಲ್ಲಿರುವ ವಿಭಾವಡಿ ರಂಗಸಿತ್ ಶಿಬಿರದಲ್ಲಿ ಸೇನಾ ಕಸರತ್ತು ನಡೆಯಲಿದೆ. 2025ರ ಸೆಪ್ಟೆಂಬರ್ನಲ್ಲಿ ಮೇಘಾಲಯದ ಉಮ್ರೊಯ್ನಲ್ಲಿ ಹಿಂದಿನ ಆವೃತ್ತಿಯ ವ್ಯಾಯಾಮ ನಡೆದಿತ್ತು.
ಭಯೋತ್ಪಾದನೆ ನಿಗ್ರಹ ಕಾರ್ಯಾಚರಣೆಗೆ ಒತ್ತು
ಭಾರತ ಮತ್ತು ಥೈಲ್ಯಾಂಡ್ ಸೇನೆಗಳು ತಲಾ 85 ಸಿಬ್ಬಂದಿಯನ್ನು ನಿಯೋಜಿಸಲಿವೆ. ಭಾರತೀಯ ತುಕಡಿಯಲ್ಲಿ ಮುಖ್ಯವಾಗಿ 9 ಗೂರ್ಖಾ ರೈಫಲ್ಸ್ ಸಿಬ್ಬಂದಿ ಇದ್ದರೆ, ಥಾಯ್ ತುಕಡಿಯಲ್ಲಿ 5ನೇ ಡಿವಿಷನ್ನ 25ನೇ ಪದಾತಿ ದಳದ 3ನೇ ಬೆಟಾಲಿಯನ್ ಸಿಬ್ಬಂದಿ ಭಾಗವಹಿಸಲಿದ್ದಾರೆ.
ಕಂಪನಿ ಮಟ್ಟದಲ್ಲಿ ನಡೆಯುವ ಈ ಜಂಟಿ ವ್ಯಾಯಾಮದಲ್ಲಿ ಅರಣ್ಯ ಮತ್ತು ಅರೆ-ನಗರ ಪ್ರದೇಶಗಳಲ್ಲಿ ಜಂಟಿ ಕಾರ್ಯಾಚರಣೆ, ದಂಗೆ ನಿಗ್ರಹ ಹಾಗೂ ಭಯೋತ್ಪಾದನಾ ನಿಗ್ರಹ ಕಾರ್ಯಾಚರಣೆಗಳಿಗೆ ತರಬೇತಿ ನೀಡಲಾಗುತ್ತದೆ.
ಕ್ಷೇತ್ರ ತರಬೇತಿ, ಯುದ್ಧ ಚರ್ಚೆಗಳು, ಉಪನ್ಯಾಸಗಳು, ಪ್ರದರ್ಶನಗಳು ಮತ್ತು ಅಂತಿಮ ಮೌಲ್ಯಮಾಪನ ವ್ಯಾಯಾಮಗಳು ನಡೆಯಲಿವೆ. ಉಭಯ ದೇಶಗಳ ಸೇನಾ ಸಿಬ್ಬಂದಿ ಕಾರ್ಯಾಚರಣೆಯ ಅನುಭವಗಳನ್ನು ಹಂಚಿಕೊಳ್ಳುವುದರ ಜೊತೆಗೆ ಆಧುನಿಕ ಉಪಕರಣಗಳು ಹಾಗೂ ತಂತ್ರಜ್ಞಾನಗಳನ್ನು ಪ್ರದರ್ಶಿಸಲಿದ್ದಾರೆ.
2006ರಲ್ಲಿ ಆರಂಭವಾದ MAITREE ವ್ಯಾಯಾಮವು ಭಾರತ ಮತ್ತು ಥೈಲ್ಯಾಂಡ್ ಸೇನೆಗಳ ನಡುವಿನ ಸಹಕಾರ, ಪರಸ್ಪರ ಕಾರ್ಯಸಾಮರ್ಥ್ಯ ಮತ್ತು ತಿಳುವಳಿಕೆಯನ್ನು ಹೆಚ್ಚಿಸುವ ಉದ್ದೇಶ ಹೊಂದಿದ್ದು, ಉಭಯ ದೇಶಗಳ ರಕ್ಷಣಾ ಸಂಬಂಧವನ್ನು ಮತ್ತಷ್ಟು ಬಲಪಡಿಸಲಿದೆ.
