ಪಾಕಿಸ್ತಾನದಲ್ಲಿ 34 ದಾಳಿ; ಹೊಣೆ ಹೊತ್ತ ಬಲೂಚ್ ಲಿಬರೇಶನ್ ಆರ್ಮಿ
ಕ್ವೆಟ್ಟಾ: ಪಾಕಿಸ್ತಾನದ ಬಲೂಚಿಸ್ತಾನ ಪ್ರಾಂತ್ಯದಲ್ಲಿ ಅಕ್ಟೋಬರ್ 9ರಿಂದ 20ರವರೆಗೆ 34 ಕಾರ್ಯಾಚರಣೆಗಳನ್ನು ನಡೆಸಿರುವುದಾಗಿ ಬಲೂಚ್ ಲಿಬರೇಶನ್ ಆರ್ಮಿ (ಬಿಎಲ್‌ಎ) ಹೇಳಿಕೊಂಡಿದೆ. ಈ ದಾಳಿಗಳಲ್ಲಿ 14 ಪಾಕಿಸ್ತಾನಿ ಸೇನಾ ಸಿಬ್ಬಂದಿ ಸೇರಿದಂತೆ ಹಲವು ಮಂದಿ ಹತರಾಗಿದ್ದಾರೆ ಎಂದು ಸಂಘಟನೆ ಪ್ರತಿಪಾದಿಸಿದೆ.
ಹರ್ನೈ ಜಿಲ್ಲೆಯ ಶಹ್ರಾಗ್‌ನಲ್ಲಿ ಸೇನಾ ವಾಹನದ ಮೇಲೆ ಸುಧಾರಿತ ಸ್ಫೋಟಕ ಸಾಧನ (ಐಇಡಿ) ಬಳಸಿ ದಾಳಿ ನಡೆಸಲಾಗಿದ್ದು, ಮೂವರು ಸೈನಿಕರು ಮೃತಪಟ್ಟಿದ್ದಾರೆ ಮತ್ತು ನಾಲ್ವರು ಗಂಭೀರವಾಗಿ ಗಾಯಗೊಂಡಿದ್ದಾರೆ ಎಂದು ಬಿಎಲ್‌ಎ ಹೇಳಿದೆ. ಕೆಚ್ ಜಿಲ್ಲೆಯ ದಷ್ಟ್, ಮಸ್ತುಂಗ್, ಖರಾನ್, ಸುರಾಬ್ ಮತ್ತು ಚಗಾಯ್ ಸೇರಿದಂತೆ ವಿವಿಧ ಪ್ರದೇಶಗಳಲ್ಲಿ ಸೇನೆ ಹಾಗೂ ಭದ್ರತಾ ಸಿಬ್ಬಂದಿಯನ್ನು ಗುರಿಯಾಗಿಸಿಕೊಂಡು ದಾಳಿ ನಡೆಸಿರುವುದಾಗಿಯೂ ಅದು ತಿಳಿಸಿದೆ.
ಚೀನಾ–ಪಾಕಿಸ್ತಾನ ಆರ್ಥಿಕ ಕಾರಿಡಾರ್ (ಸಿಪಿಇಸಿ) ವ್ಯಾಪ್ತಿಯ ಪ್ರದೇಶದಲ್ಲಿ ಮೂರು ಗಂಟೆಗಳ ಕಾಲ ನಿಯಂತ್ರಣ ಸಾಧಿಸಿದ್ದಾಗಿ, ಖುಜ್ದಾರ್‌ನಲ್ಲಿ ಪಾಕಿಸ್ತಾನಿ ಸೈನಿಕನೊಬ್ಬನನ್ನು ಸೆರೆಹಿಡಿದಿರುವುದಾಗಿ ಸಂಘಟನೆ ಹೇಳಿಕೊಂಡಿದೆ. ತಸ್ಪ್‌ನ ಸ್ಟಾರ್ ಚೌಕ್‌ನಲ್ಲಿ ನಾಲ್ಕು ಗಂಟೆಗಳ ಕಾಲ ನಿಯಂತ್ರಣ ಸಾಧಿಸಿ ಪೂರೈಕೆ ವಾಹನಗಳನ್ನು ವಶಪಡಿಸಿಕೊಂಡಿರುವುದಾಗಿಯೂ ಪ್ರತಿಪಾದಿಸಿದೆ. ಪೊಲೀಸ್ ಠಾಣೆಗಳು, ಚೆಕ್‌ಪೋಸ್ಟ್‌ಗಳು ಮತ್ತು ವಾಹನಗಳ ಮೇಲಿನ ದಾಳಿಗಳ ಹೊಣೆಯನ್ನೂ ಹೊತ್ತಿದೆ.
ಆಗಸ್ಟ್ ಮತ್ತು ಸೆಪ್ಟೆಂಬರ್‌ನಲ್ಲಿ ನಡೆದ ಪ್ರತ್ಯೇಕ ಘಟನೆಗಳಲ್ಲಿ ತನ್ನ ಆರು ಹೋರಾಟಗಾರರು ಮೃತಪಟ್ಟಿರುವುದನ್ನು ಬಿಎಲ್‌ಎ ಒಪ್ಪಿಕೊಂಡಿದೆ. ಸ್ವತಂತ್ರ ಬಲೂಚಿಸ್ತಾನ ಸ್ಥಾಪನೆಯಾಗುವವರೆಗೆ ಸಶಸ್ತ್ರ ಹೋರಾಟ ಮುಂದುವರಿಸುವುದಾಗಿ ಘೋಷಿಸಿದೆ.
