ಹಾರ್ಮುಜ್ನಲ್ಲಿ ತೈಲ ಟ್ಯಾಂಕರ್ ತಡೆದ ಇರಾನ್; ಇಸ್ರೇಲ್ ಆಡಳಿತ ಉರುಳಿಸುವುದಾಗಿ ನೆತನ್ಯಾಹು
ಟೆಹ್ರಾನ್/ಜೆರುಸಲೇಂ: ಹಾರ್ಮುಜ್ ಜಲಸಂಧಿಯ ಮೂಲಕ ‘ಅಕ್ರಮವಾಗಿ’ ಸಾಗಲು ಯತ್ನಿಸಿದ ಟೋಗೊ ಧ್ವಜದ ತೈಲ ಟ್ಯಾಂಕರ್ವೊಂದನ್ನು ದಾಳಿ ನಡೆಸಿ ತಡೆದಿರುವುದಾಗಿ ಇರಾನ್ನ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ (IRGC) ತಿಳಿಸಿದೆ. ಇದೇ ವೇಳೆ, ಇರಾನ್ ಸರ್ಕಾರವನ್ನು ಉರುಳಿಸುವುದಾಗಿ ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಹೇಳಿದ್ದಾರೆ.
IRGCಯ ‘ಸೆಪಾಹ್ ನ್ಯೂಸ್’ ಪ್ರಕಾರ, ‘ಟ್ರೆಂಡ್’ ಹೆಸರಿನ ಟ್ಯಾಂಕರ್ ಜಲಸಂಧಿ ನಿಯಮ ಉಲ್ಲಂಘಿಸಿ ಸಾಗಲು ಯತ್ನಿಸಿದ ಹಿನ್ನೆಲೆಯಲ್ಲಿ ಕಾರ್ಯಾಚರಣೆ ನಡೆಸಲಾಗಿದೆ. ದಾಳಿಯ ಬಳಿಕ ಹಡಗಿನಲ್ಲಿ ಬೆಂಕಿ ಕಾಣಿಸಿಕೊಂಡಿದ್ದು, ಅದನ್ನು ತಡೆಹಿಡಿಯಲಾಗಿದೆ ಎಂದು ಹೇಳಿದೆ.
ಅಮೆರಿಕ ಸೇನೆಯಿಂದ ‘ಪ್ರಚೋದನೆ’ಗೆ ಒಳಗಾಗಿ ಹಡಗು ಅಕ್ರಮ ಮಾರ್ಗದಲ್ಲಿ ಸಾಗಲು ಪ್ರಯತ್ನಿಸಿದೆ ಎಂದು IRGC ಆರೋಪಿಸಿದೆ. ಹಾರ್ಮುಜ್ ಜಲಸಂಧಿಯ ಮೇಲೆ ತನ್ನ ಪಡೆಗಳಿಗೆ ಬಲವಾದ ನಿಯಂತ್ರಣವಿದ್ದು, ‘ಆಕ್ರಮಣಕಾರಿ’ ಶಕ್ತಿಗಳಿಗೆ ಅವಕಾಶ ನೀಡುವುದಿಲ್ಲ ಎಂದಿದೆ.
ಇದಕ್ಕೂ ಮುನ್ನ ‘EL GAIA’ ಎಂಬ ಬೃಹತ್ ತೈಲ ಟ್ಯಾಂಕರ್ ನಿಷೇಧಿತ ಮಾರ್ಗದಲ್ಲಿ ಸಾಗಲು ಯತ್ನಿಸಿದ ವೇಳೆ ನೌಕಾ ಮೈನ್ಗೆ ತಗುಲಿ ಸ್ಫೋಟಗೊಂಡು ಬೆಂಕಿಗಾಹುತಿಯಾಗಿದೆ ಎಂದು IRGC ತಿಳಿಸಿತ್ತು.
ಹಡಗುಗಳ ನಿಯಮ ಉಲ್ಲಂಘನೆ ಹಿನ್ನೆಲೆಯಲ್ಲಿ ವಿಮಾ ಕಂಪನಿಗಳು, P&I ಕ್ಲಬ್ಗಳು ಮತ್ತು ವರ್ಗೀಕರಣ ಸಂಸ್ಥೆಗಳು ಅಂತಹ ಹಡಗುಗಳಿಗೆ ಸೇವೆ ನೀಡದಂತೆ ಇರಾನ್ನ ಪರ್ಷಿಯನ್ ಗಲ್ಫ್ ಸ್ಟ್ರೈಟ್ ಅಥಾರಿಟಿ (PGSA) ಎಚ್ಚರಿಕೆ ನೀಡಿದೆ.
ಇದೇ ವೇಳೆ ಇಸ್ರೇಲ್ ಪ್ರಧಾನಿ ನೆತನ್ಯಾಹು, ಹಮಾಸ್ ವಿರುದ್ಧದ ಕಾರ್ಯಾಚರಣೆ ಮುಂದುವರಿಸುವುದರ ಜತೆಗೆ ಇರಾನ್ನ ಆಡಳಿತವನ್ನು ಉರುಳಿಸುವುದಾಗಿ ಹೇಳಿದ್ದಾರೆ.
ಇಸ್ರೇಲ್ನ ಆಂತರಿಕ ಭದ್ರತಾ ಸಂಸ್ಥೆ ‘ಶಿನ್ ಬೆಟ್’ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ಇರಾನ್ನ ಆಡಳಿತವನ್ನು ಸೋಲಿಸಿ ಉರುಳಿಸುವುದಾಗಿ ತಿಳಿಸಿದ್ದಾರೆ. ಅಮೆರಿಕದ ಜತೆಗಿನ ಕಾರ್ಯಾಚರಣೆಯಿಂದ ಇರಾನ್ನ ಪರಮಾಣು ಮತ್ತು ಬ್ಯಾಲಿಸ್ಟಿಕ್ ಕ್ಷಿಪಣಿ ಬೆದರಿಕೆಯನ್ನು ಕಡಿಮೆ ಮಾಡಲಾಗಿದೆ ಎಂದು ಅವರು ಹೇಳಿದ್ದಾರೆ.
ಇಸ್ರೇಲ್ ಮಧ್ಯಪ್ರಾಚ್ಯದಲ್ಲಿ ಅತ್ಯಂತ ಪ್ರಬಲ ಶಕ್ತಿಯಾಗಿದ್ದು, ತನ್ನನ್ನು ‘ಪರೀಕ್ಷಿಸಲು’ ಶತ್ರುಗಳು ಮುಂದಾಗಬಾರದು ಎಂದು ನೆತನ್ಯಾಹು ಎಚ್ಚರಿಸಿದ್ದಾರೆ.
