ನವೆಂಬರ್ 5ರಿಂದ ಢಾಕಾದಲ್ಲಿ ಸಾಫ್ ಚಾಂಪಿಯನ್‌ಶಿಪ್‌ ಟೂರ್ನಿ; ಸತತ 10ನೇ ಪ್ರಶಸ್ತಿಯ ಮೇಲೆ ಹಾಲಿ ಚಾಂಪಿಯನ್ ಕಣ್ಣು
ನವದೆಹಲಿ: ನವೆಂಬರ್ 5ರಿಂದ 17ರವರೆಗೆ ಬಾಂಗ್ಲಾದೇಶದ ಢಾಕಾದಲ್ಲಿ ನಡೆಯಲಿರುವ ಸಾಫ್ ಚಾಂಪಿಯನ್‌ಶಿಪ್‌ಗೆ ಭಾರತ 28 ಸದಸ್ಯರ ಎರಡನೇ ಹಂತದ ತಂಡವನ್ನು ಪ್ರಕಟಿಸಿದೆ. 23 ವರ್ಷದೊಳಗಿನ ಆಟಗಾರರಿಗೆ ಈ ಬಾರಿ ಅವಕಾಶ ನೀಡಲಾಗಿದ್ದು, ಹಾಲಿ ಚಾಂಪಿಯನ್ ಭಾರತ ಸತತ ದಾಖಲೆಯ 10ನೇ ಪ್ರಶಸ್ತಿ ಗೆಲ್ಲುವ ಗುರಿ ಹೊಂದಿದೆ.
ಗ್ರೂಪ್ ‘ಬಿ’ಯಲ್ಲಿ ಸ್ಥಾನ ಪಡೆದಿರುವ ಭಾರತಕ್ಕೆ ಮಾಲ್ಡೀವ್ಸ್ ಮತ್ತು ಪಾಕಿಸ್ತಾನ ಎದುರಾಳಿಗಳಾಗಿವೆ. ನವೆಂಬರ್ 5ರಂದು ಪಾಕಿಸ್ತಾನ ವಿರುದ್ಧದ ಪಂದ್ಯದೊಂದಿಗೆ ಭಾರತ ತನ್ನ ಅಭಿಯಾನ ಆರಂಭಿಸಲಿದೆ.
ಇದೇ ವೇಳೆ, ಭಾರತದ ಮುಖ್ಯ ತಂಡ ನವೆಂಬರ್ 12 ಮತ್ತು 15ರಂದು ನ್ಯೂಜಿಲೆಂಡ್ ವಿರುದ್ಧ ಸ್ನೇಹಪರ ಪಂದ್ಯಗಳನ್ನು ಆಡಲಿದೆ. ಅಂತಾರಾಷ್ಟ್ರೀಯ ಪಂದ್ಯಗಳ ವೇಳಾಪಟ್ಟಿಯ ಕಾರಣ ಮುಖ್ಯ ತಂಡ ಸಾಫ್ ಟೂರ್ನಿಯಿಂದ ಹೊರಗುಳಿಯುವ ಸಾಧ್ಯತೆಯಿದೆ.
ಫಿಫಾ ಅಂತಾರಾಷ್ಟ್ರೀಯ ಪಂದ್ಯಗಳ ಅವಧಿಯ ಹೊರಗೆ ಟೂರ್ನಿಯ ಮೊದಲ ಪಂದ್ಯ ನಡೆಯುತ್ತಿರುವುದರಿಂದ ಐಎಸ್‌ಎಲ್ ಕ್ಲಬ್‌ಗಳು ತಮ್ಮ ಆಟಗಾರರನ್ನು ಬಿಡುಗಡೆ ಮಾಡಲು ಹಿಂದೇಟು ಹಾಕುತ್ತಿವೆ. ಹೀಗಾಗಿ ಯುವ ಆಟಗಾರರ ತಂಡಕ್ಕೆ ಅವಕಾಶ ನೀಡುವ ನಿರ್ಧಾರ ಕೈಗೊಳ್ಳಲಾಗಿದೆ.
