ಏಷ್ಯನ್ ಗೇಮ್ಸ್: ಸರ್ವೇಶ್ ಕುಶಾರೆ, ಆನ್ಸಿ ಸೋಜನ್ಗೆ ಬೆಳ್ಳಿ; ಪಾರುಲ್ ಚೌಧರಿಗೆ ಕಂಚು
ನಗೋಯಾ: ಐಚಿ-ನಗೋಯಾ ಏಷ್ಯನ್ ಗೇಮ್ಸ್ನಲ್ಲಿ ಭಾನುವಾರ ಭಾರತದ ಅಥ್ಲೆಟಿಕ್ಸ್ ಪಡೆ ಗಮನಾರ್ಹ ಪ್ರದರ್ಶನ ನೀಡಿದ್ದು, ಸರ್ವೇಶ್ ಕುಶಾರೆ ಮತ್ತು ಆನ್ಸಿ ಸೋಜನ್ ಬೆಳ್ಳಿ ಪದಕ ಗೆದ್ದರೆ, ಪಾರುಲ್ ಚೌಧರಿ ಕಂಚಿನ ಪದಕಕ್ಕೆ ಮುತ್ತಿಕ್ಕಿದರು.
ಪುರುಷರ ಹೈ ಜಂಪ್ನಲ್ಲಿ ಸರ್ವೇಶ್ ಕುಶಾರೆ 2.25 ಮೀಟರ್ ಎತ್ತರವನ್ನು ಕ್ರಮಿಸಿ ಬೆಳ್ಳಿ ಪದಕ ಗೆದ್ದರು. ಎರಡನೇ ಪ್ರಯತ್ನದಲ್ಲೇ ಈ ಎತ್ತರವನ್ನು ಸಾಧಿಸಿದ ಅವರು ಸ್ಪರ್ಧೆಯ ಬಹುತೇಕ ಹಂತಗಳಲ್ಲಿ ಮುನ್ನಡೆ ಕಾಯ್ದುಕೊಂಡಿದ್ದರು.
ಈ ಪದಕದೊಂದಿಗೆ ಏಷ್ಯನ್ ಗೇಮ್ಸ್ ಪುರುಷರ ಹೈ ಜಂಪ್ನಲ್ಲಿ ಭಾರತಕ್ಕೆ ಸುಮಾರು ಐದು ದಶಕಗಳ ಬಳಿಕ ಪದಕ ಒಲಿದಂತಾಗಿದೆ. ಪ್ರಧಾನಿ ನರೇಂದ್ರ ಮೋದಿ ಅವರು ಕುಶಾರೆ ಅವರನ್ನು ಅಭಿನಂದಿಸಿ, ಅವರ ಪರಿಶ್ರಮ ಮತ್ತು ದೃಢನಿಶ್ಚಯವನ್ನು ಶ್ಲಾಘಿಸಿದರು.
ಲಾಂಗ್ ಜಂಪ್ನಲ್ಲಿ ಆನ್ಸಿಗೆ ಬೆಳ್ಳಿ
ಮಹಿಳೆಯರ ಲಾಂಗ್ ಜಂಪ್ನಲ್ಲಿ ಆನ್ಸಿ ಸೋಜನ್ 6.53 ಮೀಟರ್ ಜಿಗಿತದೊಂದಿಗೆ ಬೆಳ್ಳಿ ಪದಕ ಗೆದ್ದರು. ಚೀನಾದ ಹುವಾಂಗ್ ಯಿಂಗ್ಯಿಂಗ್ ಚಿನ್ನದ ಪದಕ ಪಡೆದರು.
ಸೋಜನ್ ಅವರ ಪ್ರದರ್ಶನವನ್ನು ಪ್ರಧಾನಿ ಮೋದಿ ಶ್ಲಾಘಿಸಿ, ಬೆಳ್ಳಿ ಪದಕ ಗೆದ್ದಿದ್ದಕ್ಕಾಗಿ ಅಭಿನಂದಿಸಿದರು ಹಾಗೂ ಮುಂದಿನ ಸ್ಪರ್ಧೆಗಳಿಗೆ ಶುಭ ಹಾರೈಸಿದರು.
ಪಾರುಲ್ಗೆ ಸತತ ಎರಡನೇ ಕಂಚು
ಮಹಿಳೆಯರ 3000 ಮೀಟರ್ ಸ್ಟೀಪಲ್ಚೇಸ್ನಲ್ಲಿ ಪಾರುಲ್ ಚೌಧರಿ 9:08.67 ನಿಮಿಷಗಳ ವೈಯಕ್ತಿಕ ಶ್ರೇಷ್ಠ ಸಮಯದೊಂದಿಗೆ ಕಂಚು ಗೆದ್ದರು. ಇದು ಏಷ್ಯನ್ ಗೇಮ್ಸ್ನಲ್ಲಿ ಈ ವಿಭಾಗದಲ್ಲಿ ಅವರ ಸತತ ಎರಡನೇ ಕಂಚಿನ ಪದಕವಾಗಿದೆ.
ಬಹ್ರೇನ್ನ ವಿನ್ಫ್ರೆಡ್ ಯಾವಿ ಚಿನ್ನ, ಕಝಾಕಿಸ್ತಾನದ ನೋರಾ ಜೆರುಟೊ ತನುಯಿ ಬೆಳ್ಳಿ ಗೆದ್ದರು.
