ಕಲಬುರಗಿಯಲ್ಲಿ ಅಚ್ಚರಿ; ಭೂಗರ್ಭದಲ್ಲಿ ಶಿವಲಿಂಗಗಳ ಪತ್ತೆ

ಸ್ವಾಮೀಜಿ ಕನಸ್ಸಿನಲ್ಲಿ ಬಂದ ಶಿವಲಿಂಗ ಈಗ ಭೂಗರ್ಭದಲ್ಲಿ ಪ್ರತ್ಯಕ್ಷನಾಗಿರುವ ಘಟನೆ ಕಲಬುರಗಿ ಜಿಲ್ಲೆಯ ಅಫ್ಜಲ್ ಪುರ ತಾಲೂಕಿನ ಗೌರ ಬಿ ಗ್ರಾಮದಲ್ಲಿ ನಡೆದಿದೆ. ಈ ಗ್ರಾಮ ಇದೀಗ ಸಾರ್ವಜನಿಕರ ಕೇಂದ್ರಬಿಂದುವಾಗಿದ್ದು, ಸುತ್ತಮುತ್ತಲ ಗ್ರಾಮದ ನೂರಾರು ಮಂದಿ ಸ್ಥಳಕ್ಕೆ ಧಾವಿಸಿ ಶಿವಲಿಂಗಗಳ ದರ್ಶನ ಪಡೆದು ಪುನೀತರಾಗುತ್ತಿದ್ದಾರೆ.

ಕಳೆದ ಕೆಲವು ದಿನಗಳ ಹಿಂದೆ ಇಲ್ಲಿನ ಕೈಲಾಸನಾಥ ಸ್ವಾಮೀಜಿ ಕನಸಿನಲ್ಲಿ ಶಿವಲಿಂಗ ಪ್ರತ್ಯಕ್ಷವಾಗಿತ್ತು. ಗೌರ ಗ್ರಾಮದ ಶಿವಪ್ಪ ದಫೇದರ ಎಂಬುವರ ಜಮೀನಿನಲ್ಲಿ ಶಿವಲಿಂಗ ಇದೆ ಎಂದು ಕನಸಿನಲ್ಲಿ ಹೇಳಿದಂತಾಯಿತು ಎಂದು ಸ್ವಾಮೀಜಿ ತಿಳಿಸಿದ್ದರು. ಅದರಂತೆ ಗ್ರಾಮಸ್ಥರು ಫೆಬ್ರವರಿ 26ರಂದು ಜೆಸಿಬಿ ಯಂತ್ರದ ಅಗೆಯಲು ಆರಂಭಿಸಿದ್ದರು. ಈ ಜಮೀನಿನ 30 ಅಡಿ ಆಳದಲ್ಲಿ ಶಿವಲಿಂಗ ಪತ್ತೆಯಾಗಿದೆ.

ಶಿವಲಿಂಗವನ್ನು ಕಂಡು ಗ್ರಾಮಸ್ಥರು ಆಶ್ಚರ್ಯಕ್ಕೊಳಗಾಗಿದ್ದಾರೆ. ಈ ಸ್ಥಳದಲ್ಲಿ ಮೂರು ಶಿವಲಿಂಗಗಳು ಪತ್ತೆಯಾಗಿದ್ದು, ಲಿಂಗವನ್ನು ನೋಡಲು ಜನ ಮುಗಿಬೀಳುತ್ತಿದ್ದಾರೆ. ಈ ಸ್ಥಳದಲ್ಲಿ ಕಾಶಿಲಿಂಗವಿದ್ದು, ಇನ್ನೂ 12 ಜ್ಯೋತಿರ್ಲಿಂಗಗಳು ಪತ್ತೆಯಾಗಿದೆ.

ಈ ಶಿವಲಿಂಗಗಳನ್ನು ಕಾಣಲು ಗೌರ ಗ್ರಾಮದ ಸುತ್ತಮುತ್ತಲಿನ ಹಳ್ಳಿಗರು ಶಿವಲಿಂಗ ದರ್ಶನ ಪಡೆಯಲು ಜೀಪ್ ಮತ್ತು ದ್ವಿಚಕ್ರ ವಾಹನಗಳ ಮೂಲಕ ಆಗಮಿಸಿ ದರ್ಶನ ಪಡೆದು ಪುನೀತರಾಗುತ್ತಿದ್ದಾರೆ. ಇಲ್ಲಿ ಪತ್ತೆಯಾದ ಲಿಂಗಗಳು ಮತ್ತು ದೊಡ್ಡ ದೊಡ್ಡ ಬಂಡೆಗಳು ಶಿಖರದ ಕಳಸಗಳು ಪುರಾತನವಾಗಿವೆ. ಬಂಡೆಗಳ ಮೇಲೆ ವಿವಿಧ ಕೆತ್ತನೆಗಳಿದ್ದು, ಪುರಾತತ್ವ ಇಲಾಖೆ ಇವು ಯಾವ ಕಾಲದ್ದೆಂದು ಪತ್ತೆ ಹಚ್ಚುತ್ತಿದ್ದಾರೆ