ಹುಟ್ಟುವ ಮುನ್ನವೇ ಮಗುವಿನ ಬೆನ್ನುಮೂಳೆ ಶಸ್ತ್ರಚಿಕಿತ್ಸೆ: AIIMS ವೈದ್ಯರ ಸಾಧನೆ
ನವದೆಹಲಿ: ದೆಹಲಿಯ ಅಖಿಲ ಭಾರತ ವೈದ್ಯಕೀಯ ವಿಜ್ಞಾನ ಸಂಸ್ಥೆ (AIIMS) ವೈದ್ಯರು ಗರ್ಭದಲ್ಲಿದ್ದ 25 ವಾರಗಳ ಮಗುವಿನ ಬೆನ್ನುಮೂಳೆಯ ಗಂಭೀರ ದೋಷವನ್ನು ಶಸ್ತ್ರಚಿಕಿತ್ಸೆ ಮೂಲಕ ಯಶಸ್ವಿಯಾಗಿ ಸರಿಪಡಿಸಿದ್ದಾರೆ. ಇದು ಭಾರತದಲ್ಲಿ ನಡೆದ ಮೊದಲ ಓಪನ್ ಫೀಟಲ್ ಸರ್ಜರಿಯಾಗಿದೆ.
ನವೆಂಬರ್ 12ರಂದು ಸುಮಾರು ಆರು ಗಂಟೆಗಳ ಕಾಲ ನಡೆದ ಶಸ್ತ್ರಚಿಕಿತ್ಸೆಯಲ್ಲಿ, ಮಗುವಿಗೆ ಕಾಣಿಸಿಕೊಂಡಿದ್ದ ‘ಲಂಬೋಸ್ಯಾಕ್ರಲ್ ಮೈಲೋಮೆನಿಂಗೋಸೀಲ್’ ಎಂಬ ಸ್ಪೈನಾ ಬಿಫಿಡಾದ ತೀವ್ರ ಸ್ವರೂಪದ ದೋಷಕ್ಕೆ ಚಿಕಿತ್ಸೆ ನೀಡಲಾಗಿದೆ. ಈ ಸಮಸ್ಯೆಯಿಂದ ಬೆನ್ನುಹುರಿ ಮತ್ತು ಅದರ ಹೊದಿಕೆಗಳು ಬೆನ್ನುಮೂಳೆಯ ತೆರೆಯ ಭಾಗದಿಂದ ಹೊರಚಾಚಿ, ಮೆದುಳು-ಬೆನ್ನುಹುರಿ ದ್ರವ ಸೋರಿಕೆಯಾಗುತ್ತಿತ್ತು.
ಶಸ್ತ್ರಚಿಕಿತ್ಸೆಗೂ ಮುನ್ನ ಐದು ವಾರಗಳಿಗೂ ಹೆಚ್ಚು ಕಾಲ ಬಹುಶಿಸ್ತೀಯ ವೈದ್ಯಕೀಯ ತಂಡ ಸಿದ್ಧತೆ ನಡೆಸಿತ್ತು. AIIMSನ ನ್ಯೂರೋಸೈನ್ಸಸ್ ಕೇಂದ್ರದಲ್ಲಿ ಅತ್ಯಾಧುನಿಕ ಮೈಕ್ರೋಸ್ಕೋಪಿ ಮತ್ತು ನಿರಂತರ ಅಲ್ಟ್ರಾಸೌಂಡ್ ನೆರವಿನಿಂದ ಶಸ್ತ್ರಚಿಕಿತ್ಸೆ ನಡೆಸಲಾಯಿತು. ವಿವಿಧ ವಿಭಾಗಗಳ 30ಕ್ಕೂ ಹೆಚ್ಚು ವೈದ್ಯರು ಮತ್ತು ನರ್ಸ್‌ಗಳು ಇದರಲ್ಲಿ ಭಾಗವಹಿಸಿದ್ದರು.
ಈ ದೋಷದಿಂದ ಮಕ್ಕಳಲ್ಲಿ ಪಾರ್ಶ್ವವಾಯು, ಹೈಡ್ರೋಸೆಫಾಲಸ್ ಹಾಗೂ ದೀರ್ಘಕಾಲದ ನರಮಂಡಲದ ಅಂಗವೈಕಲ್ಯ ಉಂಟಾಗುವ ಸಾಧ್ಯತೆಯಿದೆ ಎಂದು AIIMS ತಿಳಿಸಿದೆ. ಆಯ್ದ ಗರ್ಭಾವಸ್ಥೆಗಳಲ್ಲಿ ಮಾತ್ರ ಈ ಶಸ್ತ್ರಚಿಕಿತ್ಸೆ ಸೂಕ್ತವಾಗಿದ್ದು, ಇದು ನರನಾಳದ ದೋಷ ತಡೆಗಟ್ಟುವ ಕ್ರಮಗಳಿಗೆ ಪರ್ಯಾಯವಲ್ಲ ಎಂದು ವೈದ್ಯರು ಸ್ಪಷ್ಟಪಡಿಸಿದ್ದಾರೆ.
ತಾಯಿ ಮತ್ತು ಭ್ರೂಣದ ಆರೋಗ್ಯವನ್ನು ಹೆರಿಗೆ ಹಾಗೂ ನವಜಾತ ಶಿಶುವಿನ ಹಂತದವರೆಗೆ ವೈದ್ಯಕೀಯ ತಂಡ ಮೇಲ್ವಿಚಾರಣೆ ಮಾಡಲಿದೆ. ಭಾರತ ಸರ್ಕಾರದ ಜನನಿ ಶಿಶು ಸುರಕ್ಷಾ ಕಾರ್ಯಕ್ರಮದಡಿ ಕುಟುಂಬಕ್ಕೆ ಈ ಶಸ್ತ್ರಚಿಕಿತ್ಸೆಯನ್ನು ಉಚಿತವಾಗಿ ಒದಗಿಸಲಾಗಿದೆ.
