ನಟಿ ಶ್ರುತಿ ಬಿಗ್ ಬಾಸ್ 3ಶೋನ ಪ್ರಶಸ್ತಿಗೆ ಭಾಜನ: 50 ಲಕ್ಷ ರೂಪಾಯಿ ಮೌಲ್ಯದ ಫ್ಲ್ಯಾಟ್
ಬೆಂಗಳೂರು: ಕನ್ನಡದ ರಿಯಾಲಿಟಿ ಶೋ ಬಿಗ್ ಬಾಸ್ 3ಶೋನ ವಿಜೇತರಾಗಿ ಖ್ಯಾತ ನಟಿ ಶ್ರುತಿ ಹೊರಹೊಮ್ಮಿದ್ದಾರೆ. ಗ್ರ್ಯಾಂಡ್ ಫಿನಾಲೆಗೆ ನಟರಾದ ಶ್ರುತಿ, ಆನಂದ, ಚಂದನ್, ಪೂಜಾಗಾಂಧಿ ಮತ್ತು ನ್ಯೂಸ್ ಆಂಕರ್ ರೆಹಮಾನ್ ಲಗ್ಗೆ ಇಟ್ಟಿದ್ದರು. ಆದರೆ, ಆನಂದ, ಪೂಜಾಗಾಂಧಿ ಮತ್ತು ರೆಹಮಾನ್ ಅವರನ್ನು ಮಣಿಸಿ ಅಂತಿಮ ಸುತ್ತಿಗೆ ಶ್ರುತಿ ಮತ್ತು ಚಂದನ್ ತಲುಪಿದ್ದರು. ಅಂತಿಮವಾಗಿ ನಟಿ ಶ್ರುತಿ ಬಿಗ್ ಬಾಸ್ ಪ್ರಶಸ್ತಿ ಭಾಜನರಾದರು. ಈ ಮೂಲಕ 50 ಲಕ್ಷ ರೂಪಾಯಿ ಮೌಲ್ಯದ ಫ್ಲ್ಯಾಟ್ ಪಡೆದರು. ನಟ ಚಂದನ್ ರನ್ನರ್ ಆಪ್ ಸ್ಥಾನಕ್ಕೆ ತೃಪ್ತಿಪಟ್ಟಕೊಳ್ಳಬೇಕಾಯಿತು.
ವಿಜೇತರ ಹೆಸರನ್ನು ಬಿಗ್ ಬಾಸ್ ಕಾರ್ಯಕ್ರಮದ ನಿರೂಪಕ, ಕಿಚ್ಚ ಸುದೀಪ್ ಹೇಳುತ್ತಿದ್ದಂತೆಯೇ ಶ್ರುತಿ ವೇದಿಕೆಗೆ ನಮಸ್ಕರಿಸುವ ಮೂಲಕ ಪ್ರೇಕ್ಷಕರಿಗೆ ಕೃತಜ್ಞತೆ ಸಲ್ಲಿಸಿದರು. ಈ ಸಂದರ್ಭದಲ್ಲಿ ಶ್ರುತಿ ಕುಟುಂಬದ ಸದಸ್ಯರು ಕೂಡ ಉಪಸ್ಥಿತರಿದ್ದರು. ಅಲ್ಲದೇ, 3ನೇ ಆವೃತ್ತಿಯ ಬಿಗ್ ಬಾಸ್ ನ ಎಲ್ಲಾ ಸ್ಪರ್ಧಾಳುಗಳು ಹಾಜರಿದ್ದರು.
ಭಾನುವಾರ ನಸುಕಿನ ವೇಳೆ ಗ್ರ್ಯಾಂಡ್ ಫಿನಾಲೆ ಸಮಾರಂಭದಲ್ಲಿ ಫಲಿತಾಂಶ ಹೊರಬಿದ್ದಿತ್ತು. ಶ್ರುತಿ ಗೆಲುವಿನ ಬೆನ್ನಲ್ಲೇ ವಾಟ್ಸಪ್ ಸೇರಿದಂತೆ ವಿವಿಧ ಸಾಮಾಜಿಕ ಜಾಲತಾಣಗಳಲ್ಲಿ ಸುದ್ದಿ ಹರಿದಾಡುತ್ತಿದ್ದವು. ಜೊತೆಗೆ ಕಳೆದ ಬಿಗ್ ಬಾಸ್ ಸೀಸನ್ ನಲ್ಲಿ ಹುಟ್ಟಿಕೊಂಡ ವಾದದಂತೆಯೇ ಛೇ ಅವರು ಗೆಲ್ಲಬೇಕಿತ್ತು. ಇವರು ಗೆಲ್ಲಬೇಕಿತ್ತು ಎಂಬ ಅಸಮಾಧಾನದ ಹೊಗೆ ಈ ಬಾರಿಯೂ ಮುಂದುವರಿದಿದೆ..
