ತೃತೀಯ ಭಾಷೆಗೆ AI ಪರ್ಯಾಯ ಬೇಡ: ಭಾಷಾ ಶಿಕ್ಷಣದ ಜತೆ AI ಕಲಿಕೆ ಅಗತ್ಯ; ದೇಶೀಯ ಭಾಷಾ ಹಿತರಕ್ಷಣಾ ವೇದಿಕೆ

ಬೆಂಗಳೂರು: ಸರ್ಕಾರಿ ಶಾಲೆಗಳಲ್ಲಿ ಆರನೇ ತರಗತಿಯಿಂದ ಕೃತಕ ಬುದ್ಧಿಮತ್ತೆ (AI) ಶಿಕ್ಷಣ ಪರಿಚಯಿಸುವ ರಾಜ್ಯ ಸರ್ಕಾರದ ಚಿಂತನೆ ಕಾಲದ ಅಗತ್ಯಕ್ಕೆ ತಕ್ಕ ಹೆಜ್ಜೆಯಾಗಿದೆ. ಆದರೆ AIಯನ್ನು ತೃತೀಯ ಭಾಷೆಗೆ ಪರ್ಯಾಯವಾಗಿ ಪರಿಚಯಿಸುವ ಪ್ರಸ್ತಾವನೆಯನ್ನು ಮರುಪರಿಶೀಲಿಸಬೇಕು ಎಂದು ದೇಶೀಯ ಭಾಷಾ ಹಿತರಕ್ಷಣಾ ವೇದಿಕೆ ಆಗ್ರಹಿಸಿದೆ.

ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರು ಆರನೇ ತರಗತಿಯಿಂದ AI ಶಿಕ್ಷಣ ಪರಿಚಯಿಸುವ ‘AI ಅಕ್ಷರ ಅಭಿಯಾನ–ಕೋಡಿಂಗ್ ಗುರುಕುಲ’ ಯೋಜನೆ ಘೋಷಿಸಿದ್ದರು. ಈಗಾಗಲೇ 9ನೇ ತರಗತಿ ವಿದ್ಯಾರ್ಥಿಗಳಿಗೆ AI ತರಬೇತಿ ಆರಂಭವಾಗಿದ್ದು, ಅದನ್ನು 6ನೇ ತರಗತಿಗೆ ವಿಸ್ತರಿಸುವ ಚಿಂತನೆ ನಡೆದಿದೆ.

AI ಮತ್ತು ಭಾಷೆ ಒಂದೇ ರೀತಿಯ ಕಲಿಕಾ ಅಗತ್ಯಗಳನ್ನು ಪೂರೈಸುವುದಿಲ್ಲ. AI ತಾಂತ್ರಿಕ ಕೌಶಲ್ಯ ಬೆಳೆಸಿದರೆ, ಭಾಷೆ ಚಿಂತನೆ, ಪ್ರಶ್ನಿಸುವಿಕೆ, ತರ್ಕ, ಅಭಿವ್ಯಕ್ತಿ ಹಾಗೂ ಸೃಜನಶೀಲತೆಗೆ ಆಧಾರವಾಗುತ್ತದೆ. ಹೀಗಾಗಿ ಒಂದನ್ನು ಮತ್ತೊಂದರ ಸ್ಥಾನದಲ್ಲಿ ನಿಲ್ಲಿಸುವುದು ಸೂಕ್ತವಲ್ಲ ಎಂದು ವೇದಿಕೆ ಹೇಳಿದೆ.

ಶಿಕ್ಷಣ ತಜ್ಞ ಡಾ. ನಿರಂಜನಾರಾಧ್ಯ ವಿ.ಪಿ. ಅವರು ಮಕ್ಕಳ ಆಸಕ್ತಿ, ಸಾಮರ್ಥ್ಯ ಮತ್ತು ಆಯ್ಕೆಗೆ ಅವಕಾಶ ಕಲ್ಪಿಸುವ ಅಗತ್ಯವನ್ನು ಒತ್ತಿಹೇಳಿದ್ದಾರೆ. ತಂತ್ರಜ್ಞಾನವು ಸ್ವತಂತ್ರ ಚಿಂತನೆಗೆ ಪರ್ಯಾಯವಾಗದೆ, ಅದಕ್ಕೆ ಪೂರಕವಾಗಬೇಕು ಎಂಬುದು ಅವರ ನಿಲುವು.

UNESCOಯ AI Competency Framework ಕೂಡ AI ಶಿಕ್ಷಣವನ್ನು ತಾಂತ್ರಿಕ ಕೌಶಲ್ಯಕ್ಕೆ ಮಾತ್ರ ಸೀಮಿತಗೊಳಿಸದೆ ಮಾನವಕೇಂದ್ರಿತ ಮನೋಭಾವ ಮತ್ತು AI ನೈತಿಕತೆಗೂ ಒತ್ತು ನೀಡುತ್ತದೆ.

ರಾಷ್ಟ್ರೀಯ ಶಿಕ್ಷಣ ನೀತಿ–2020ರ ಬಹುಭಾಷಾ ದೃಷ್ಟಿಕೋನವನ್ನೂ ಗಮನದಲ್ಲಿಟ್ಟುಕೊಂಡು ತೃತೀಯ ಭಾಷೆಯನ್ನು ಮುಂದುವರಿಸಬೇಕು. AIಯನ್ನು ಪ್ರತ್ಯೇಕ ವಿಷಯವಾಗಿ ಅಥವಾ ಇತರ ವಿಷಯಗಳೊಂದಿಗೆ ಸಮನ್ವಯಗೊಳಿಸಬಹುದು. ಭಾಷಾ ಕಲಿಕೆಯಲ್ಲೂ AIಯನ್ನು ಪರಿಣಾಮಕಾರಿ ಸಾಧನವಾಗಿ ಬಳಸಬಹುದು.

“ತೃತೀಯ ಭಾಷೆಗೆ AI ಪರ್ಯಾಯವಲ್ಲ; AIಗೆ ಭಾಷೆಯೂ ಸಹಯಾತ್ರಿ” ಎಂದು ವೇದಿಕೆ ತಿಳಿಸಿದೆ.