57ನೇ ಐಎಫ್ಎಫ್‌ಐನಲ್ಲಿ ಬ್ರಿಕ್ಸ್ ರಾಷ್ಟ್ರಗಳ 21 ಚಿತ್ರಗಳ ಪ್ರದರ್ಶನ
ಪಣಜಿ: ಗೋವಾದಲ್ಲಿ ನಡೆಯಲಿರುವ 57ನೇ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ (ಐಎಫ್ಎಫ್‌ಐ) ಬ್ರಿಕ್ಸ್ ರಾಷ್ಟ್ರಗಳ 21 ಚಲನಚಿತ್ರಗಳು ‘ಫಿಲ್ಮ್ಸ್ ಫ್ರಂ ಬ್ರಿಕ್ಸ್’ ವಿಶೇಷ ವಿಭಾಗದಡಿ ಪ್ರದರ್ಶನಗೊಳ್ಳಲಿವೆ. ಪ್ರಜಾಪ್ರಭುತ್ವ, ಸ್ವಾತಂತ್ರ್ಯ, ಗುರುತು, ಸಾಮಾಜಿಕ ಅಸಮಾನತೆ ಮತ್ತು ಜಾಗತಿಕ ಸಮಸ್ಯೆಗಳನ್ನು ಈ ಚಿತ್ರಗಳು ಬಿಂಬಿಸಲಿವೆ.
ವಿವಿಧ ಭಾಷೆ ಮತ್ತು ಪ್ರಕಾರಗಳ ಚಿತ್ರಗಳನ್ನು ಒಳಗೊಂಡಿರುವ ಈ ವಿಭಾಗವು ಆಯಾ ದೇಶಗಳ ಇತಿಹಾಸ ಹಾಗೂ ಸಾಮಾಜಿಕ ವಾಸ್ತವಗಳನ್ನು ಪ್ರತಿಬಿಂಬಿಸಲಿದೆ. ಪ್ರಜಾಪ್ರಭುತ್ವ ಪರ ಚಳವಳಿಗಳು, ಗುಲಾಮಗಿರಿ ಮತ್ತು ವಸಾಹತುಶಾಹಿ ಆಡಳಿತದ ವಿರುದ್ಧದ ಹೋರಾಟಗಳ ಜೊತೆಗೆ ಕುಟುಂಬ ಸಂಬಂಧಗಳು, ಸ್ಥಳಾಂತರ ಮತ್ತು ಅಸ್ಮಿತೆಯಂತಹ ವಿಷಯಗಳನ್ನೂ ಚಿತ್ರಗಳು ಅನಾವರಣಗೊಳಿಸಲಿವೆ.
ಬ್ರೆಜಿಲ್‌ನ ‘ಅಮಾಡಿಯೊ ಅಂಡ್ ದಿ ಸ್ಪೆಕ್ಯುಲೇಟಿವ್ ನ್ಯೂ ವರ್ಲ್ಡ್’ ಚಿತ್ರವು 1830ರ ದಶಕದಲ್ಲಿ ಗುಲಾಮಗಿರಿ ವಿರುದ್ಧದ ಹೋರಾಟದಲ್ಲಿ ತೊಡಗುವ ಆಫ್ರಿಕನ್ ಸಂಶೋಧಕನ ಕಥೆಯನ್ನು ಹೇಳುತ್ತದೆ. ಇಂಡೋನೇಷ್ಯಾದ ‘ದಿ ಸೀ ಸ್ಪೀಕ್ಸ್ ಹಿಸ್ ನೇಮ್’ 1998ರ ಪ್ರಜಾಪ್ರಭುತ್ವ ಪರ ಚಳವಳಿಯ ಸಂದರ್ಭದಲ್ಲಿ ನಾಪತ್ತೆಯಾದ ವಿದ್ಯಾರ್ಥಿ ಕಾರ್ಯಕರ್ತರ ಕಥೆಯನ್ನು ಆಧರಿಸಿದೆ. ದಕ್ಷಿಣ ಆಫ್ರಿಕಾದ ‘ದಿ ಟ್ರೆಕ್’ 19ನೇ ಶತಮಾನದ ವಸಾಹತುಶಾಹಿ ಗಡಿಗಳ ಕುರಿತು ಬೆಳಕು ಚೆಲ್ಲುತ್ತದೆ.
‘ಡ್ರೀಮಿಂಗ್ ಆಫ್ ಸೆರೆನಾಡಾ’ ಚಿತ್ರದಲ್ಲಿ ಹವಾಮಾನ ಬದಲಾವಣೆಯ ಪರಿಣಾಮಗಳನ್ನು ಪರಿಶೀಲಿಸಲಾಗಿದೆ. ಇಥಿಯೋಪಿಯಾದ ‘ಫಯಾ ದಯಿ’ ಚಿತ್ರವು ಖಾಟ್ ಕೃಷಿಯನ್ನು ಅವಲಂಬಿಸಿರುವ ಸಮುದಾಯಗಳ ಬದುಕನ್ನು ಚಿತ್ರಿಸುತ್ತದೆ. ಇರಾನ್‌ನ ‘ಪೌಲ್ಟ್ರಿ ಫಾರ್ಮ್’ ಕಾಣೆಯಾದ ಸ್ನೇಹಿತನನ್ನು ಹುಡುಕುವ ದಾಖಲೆರಹಿತ ಇರಾಕಿ ಮಗುವಿನ ಕಥೆಯನ್ನು ಒಳಗೊಂಡಿದೆ.
ಸೌದಿ ಅರೇಬಿಯಾದ ‘ಹಿಜ್ರಾ’, ಚೀನಾದ ‘ಎಂಬರ್ಸ್’, ಬೊಲಿವಿಯಾ-ಪೆರು ಜಂಟಿ ನಿರ್ಮಾಣದ ‘ದಿ ಕಾಂಡೋರ್ ಡಾಟರ್’ ಹಾಗೂ ನೈಜೀರಿಯಾ-ಯುಕೆ ನಿರ್ಮಾಣದ ‘ಲೇಡಿ’ ಕೂಡ ಈ ವಿಭಾಗದಲ್ಲಿ ಪ್ರದರ್ಶನಗೊಳ್ಳಲಿವೆ.
ಭಾರತದ ಪರವಾಗಿ ಆದಿತ್ಯ ಧಾರ್ ನಿರ್ದೇಶನದ ‘ಆರ್ಟಿಕಲ್ 370’ ಚಿತ್ರ ಆಯ್ಕೆಯಾಗಿದೆ. 2016ರ ಕಾಶ್ಮೀರ ಅಶಾಂತಿಯ ಹಿನ್ನೆಲೆಯಲ್ಲಿ ಆರ್ಟಿಕಲ್ 370 ರದ್ದತಿಯ ಉದ್ದೇಶದ ಸುತ್ತ ಚಿತ್ರದ ಕಥೆ ಸಾಗುತ್ತದೆ. ಈ ಚಿತ್ರ 72ನೇ ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿಗಳಲ್ಲಿ ಮೂರು ಗೌರವಗಳನ್ನು ಪಡೆದಿದೆ.
ನವೆಂಬರ್ 20ರಿಂದ 28ರವರೆಗೆ ಗೋವಾದ ವಿವಿಧ ಸ್ಥಳಗಳಲ್ಲಿ ಐಎಫ್ಎಫ್‌ಐ ನಡೆಯಲಿದೆ. 86 ದೇಶಗಳ 150ಕ್ಕೂ ಹೆಚ್ಚು ಅಂತರರಾಷ್ಟ್ರೀಯ ಚಿತ್ರಗಳು ಸ್ಪರ್ಧಾತ್ಮಕ ಮತ್ತು ಸ್ಪರ್ಧಾತ್ಮಕವಲ್ಲದ ವಿಭಾಗಗಳು, ಹಿನ್ನೋಟ ಪ್ರದರ್ಶನಗಳು ಹಾಗೂ ವಿಷಯಾಧಾರಿತ ವಿಭಾಗಗಳಲ್ಲಿ ಪ್ರದರ್ಶನಗೊಳ್ಳಲಿವೆ.
