ಅ.1ರಿಂದ ಸಬ್ಸಿಡಿ LPG ಪ್ರಯೋಜನಕ್ಕೆ ಆಧಾರ್ ಬಯೋಮೆಟ್ರಿಕ್ ಕಡ್ಡಾಯ; ದೃಢೀಕರಣವನ್ನು ಹೀಗೆ ಮಾಡಿಕೊಳ್ಳಿ
ನವದೆಹಲಿ: ಸಬ್ಸಿಡಿ ಸಹಿತ ದರದಲ್ಲಿ ಗೃಹಬಳಕೆಯ ಎಲ್ಪಿಜಿ ರೀಫಿಲ್ ಪಡೆಯಲು ಅಕ್ಟೋಬರ್ 1, 2026ರಿಂದ ಆಧಾರ್ ಆಧಾರಿತ ಬಯೋಮೆಟ್ರಿಕ್ ದೃಢೀಕರಣ (BAA) ಪೂರ್ಣಗೊಳಿಸುವುದು ಕಡ್ಡಾಯವಾಗಲಿದೆ ಎಂದು ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯ ತಿಳಿಸಿದೆ.
ಈಗಾಗಲೇ ಬಯೋಮೆಟ್ರಿಕ್ ದೃಢೀಕರಣ ಪೂರ್ಣಗೊಳಿಸಿರುವ ಗ್ರಾಹಕರು ಯಾವುದೇ ಹೆಚ್ಚುವರಿ ಕ್ರಮ ಕೈಗೊಳ್ಳಬೇಕಿಲ್ಲ. ಸೆ.19ರ ವೇಳೆಗೆ ಸಕ್ರಿಯ ಗೃಹಬಳಕೆಯ ಎಲ್ಪಿಜಿ ಗ್ರಾಹಕರಲ್ಲಿ 89.9% ಅಥವಾ 27.43 ಕೋಟಿ ಮಂದಿ ಪ್ರಕ್ರಿಯೆ ಪೂರ್ಣಗೊಳಿಸಿದ್ದಾರೆ ಎಂದು ಸಚಿವಾಲಯ ತಿಳಿಸಿದೆ.
ಸಬ್ಸಿಡಿ ಅರ್ಹ ಕುಟುಂಬಗಳಿಗೆ ಮಾತ್ರ ತಲುಪುವಂತೆ ಮಾಡುವುದು, ನಕಲಿ ಹಾಗೂ ಅನರ್ಹ ಸಂಪರ್ಕಗಳನ್ನು ಗುರುತಿಸುವುದು ಮತ್ತು ಗೃಹಬಳಕೆಯ ಸಿಲಿಂಡರ್ಗಳ ವಾಣಿಜ್ಯ ಬಳಕೆಯನ್ನು ತಡೆಯುವುದು ದೃಢೀಕರಣದ ಪ್ರಮುಖ ಉದ್ದೇಶವಾಗಿದೆ. ಆಧಾರ್ ಆಧಾರಿತ ದೃಢೀಕರಣವು ಫಲಾನುಭವಿಗಳ ಗುರುತಿಸುವಿಕೆ ಮತ್ತು ಸಬ್ಸಿಡಿ ವಿತರಣೆಯನ್ನು ಹೆಚ್ಚು ಪರಿಣಾಮಕಾರಿಯಾಗಿಸಲು ನೆರವಾಗುತ್ತದೆ.
ಇನ್ನೂ BAA ಪೂರ್ಣಗೊಳಿಸದವರು ಎಲ್ಪಿಜಿ ಸಿಲಿಂಡರ್ ವಿತರಣೆ ವೇಳೆ ಡೆಲಿವರಿ ಸಿಬ್ಬಂದಿಯ ಸಹಾಯದಿಂದ, ಎಲ್ಪಿಜಿ ವಿತರಕರ ಶೋರೂಮ್ನಲ್ಲಿ ಅಥವಾ ಸಂಬಂಧಿತ ತೈಲ ಮಾರುಕಟ್ಟೆ ಕಂಪನಿಯ (OMC) ಮೊಬೈಲ್ ಆ್ಯಪ್ ಮೂಲಕ ಪ್ರಕ್ರಿಯೆ ಪೂರ್ಣಗೊಳಿಸಬಹುದು.
ಇಂಡೇನ್ ಗ್ರಾಹಕರು IndianOil ONE, ಭಾರತ್ಗ್ಯಾಸ್ ಗ್ರಾಹಕರು HelloBPCL ಹಾಗೂ ಎಚ್ಪಿ ಗ್ಯಾಸ್ ಗ್ರಾಹಕರು HP PAY ಆ್ಯಪ್ ಬಳಸಬಹುದು.
BAA ಮಾಡದಿದ್ದರೆ ಮಾರುಕಟ್ಟೆ ದರ
ಬಯೋಮೆಟ್ರಿಕ್ ದೃಢೀಕರಣ ಮಾಡಲು ಸಾಧ್ಯವಾಗದ ಅಥವಾ ಇಚ್ಛಿಸದ ಗ್ರಾಹಕರು OMCಯ ಡಿಜಿಟಲ್ ಚಾನೆಲ್ಗಳ ಮೂಲಕ ತಮ್ಮ ಆಯ್ಕೆಯನ್ನು ನೋಂದಾಯಿಸಿಕೊಳ್ಳಬಹುದು. ಇಂತಹ ಗ್ರಾಹಕರಿಗೆ ಸಬ್ಸಿಡಿ ರಹಿತ ಮಾರುಕಟ್ಟೆ ದರದಲ್ಲಿ, ಲಭ್ಯತೆಗೆ ಅನುಗುಣವಾಗಿ 5 ಕೆಜಿ ಅಥವಾ 10 ಕೆಜಿ ಸಿಲಿಂಡರ್ಗಳಲ್ಲಿ ಎಲ್ಪಿಜಿ ದೊರೆಯಲಿದೆ ಎಂದು ಸಚಿವಾಲಯ ತಿಳಿಸಿದೆ.
BAA ಪೂರ್ಣಗೊಳಿಸಲು ಈ ಹಿಂದೆ ಹಲವು ಗಡುವುಗಳನ್ನು ವಿಸ್ತರಿಸಲಾಗಿದ್ದು, ಸೆ.14 ಅಂತಿಮ ಗಡುವಾಗಿತ್ತು. OMCಗಳು 2023ರ ಅಕ್ಟೋಬರ್ನಿಂದ SMS, ವಾಟ್ಸಾಪ್ ಸಂದೇಶ, ವಿಶೇಷ ಶಿಬಿರ ಮತ್ತು ವೈಯಕ್ತಿಕ ಸಂಪರ್ಕದ ಮೂಲಕ ಜಾಗೃತಿ ಅಭಿಯಾನ ನಡೆಸುತ್ತಿವೆ.
ಹೆಚ್ಚಿನ ಮಾಹಿತಿ ಅಥವಾ ನೆರವಿಗಾಗಿ LPG ಸಹಾಯವಾಣಿ: 1800 2333 555 ಸಂಪರ್ಕಿಸಬಹುದು.
