ರೈಲ್ಒನ್ಗೆ ಭರ್ಜರಿ ಸ್ಪಂದನೆ; ದಿನಕ್ಕೆ 10 ಲಕ್ಷ ಟಿಕೆಟ್ ಬುಕಿಂಗ್
ನವದೆಹಲಿ: ಭಾರತೀಯ ರೈಲ್ವೆಯ ಡಿಜಿಟಲ್ ಸೇವೆಗಳಿಗೆ ಪ್ರಯಾಣಿಕರಿಂದ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದ್ದು, ರೈಲ್ಒನ್ ಅಪ್ಲಿಕೇಶನ್ ಈಗ 4.76 ಕೋಟಿ ಡೌನ್ಲೋಡ್ಗಳನ್ನು ದಾಟಿದೆ. 2026ರ ಆಗಸ್ಟ್ 2ರ ವೇಳೆಗೆ ಆ್ಯಪ್ ಮೂಲಕ ಪ್ರತಿದಿನ ಸರಾಸರಿ 10 ಲಕ್ಷ ಟಿಕೆಟ್ಗಳು ಬುಕ್ ಆಗುತ್ತಿವೆ ಎಂದು ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್ ಲೋಕಸಭೆಗೆ ತಿಳಿಸಿದ್ದಾರೆ.
2025ರ ಜುಲೈ 1ರಂದು ಆರಂಭವಾದ ರೈಲ್ಒನ್, ಕಾಯ್ದಿರಿಸಿದ ಹಾಗೂ ಕಾಯ್ದಿರಿಸದ ಟಿಕೆಟ್ಗಳು, ಪ್ಲಾಟ್ಫಾರ್ಮ್ ಟಿಕೆಟ್, ರೈಲು ಮತ್ತು ಪಿಎನ್ಆರ್ ಮಾಹಿತಿ, ರೈಲ್ಮದಾದ್ ಸೇರಿದಂತೆ ಹಲವು ಸೇವೆಗಳನ್ನು ಒಂದೇ ವೇದಿಕೆಯಲ್ಲಿ ಒದಗಿಸುತ್ತದೆ. ಒಂದೇ ಸೈನ್-ಆನ್ ವ್ಯವಸ್ಥೆಯ ಮೂಲಕ ಪ್ರಯಾಣಿಕರು ವಿವಿಧ ಸೇವೆಗಳನ್ನು ಸುಲಭವಾಗಿ ಬಳಸಬಹುದಾಗಿದೆ.
ಆಗಸ್ಟ್ 2ರ ವೇಳೆಗೆ ಪ್ರತಿದಿನ ಸರಾಸರಿ 2.79 ಲಕ್ಷ ಕಾಯ್ದಿರಿಸಿದ ಹಾಗೂ 7.24 ಲಕ್ಷ ಕಾಯ್ದಿರಿಸದ ಟಿಕೆಟ್ಗಳು ರೈಲ್ಒನ್ ಮೂಲಕ ಬುಕ್ ಆಗುತ್ತಿವೆ.
ಡಿಜಿಟಲ್ ರೈಲು ಮಾಹಿತಿ ಸೇವೆಗೂ ಹೆಚ್ಚಿದ ಬೇಡಿಕೆ
ರಾಷ್ಟ್ರೀಯ ರೈಲು ವಿಚಾರಣಾ ವ್ಯವಸ್ಥೆ (NTES) ಪ್ರತಿದಿನ 6 ಕೋಟಿಗೂ ಹೆಚ್ಚು ವಿಚಾರಣೆಗಳನ್ನು ನಿರ್ವಹಿಸುತ್ತಿದ್ದು, ಸುಮಾರು 80,000 ಏಕಕಾಲೀನ ಬಳಕೆದಾರರಿಗೆ ಸೇವೆ ನೀಡುತ್ತಿದೆ. ರೈಲುಗಳ ಆಗಮನ, ನಿರ್ಗಮನ ಮತ್ತು ವೇಳಾಪಟ್ಟಿ ಕುರಿತು ಬಹುತೇಕ ನೈಜ-ಸಮಯದ ಮಾಹಿತಿಯನ್ನು ವೆಬ್ಸೈಟ್, ಮೊಬೈಲ್ ಆ್ಯಪ್ಗಳು, ವಿಚಾರಣಾ ಕೌಂಟರ್ಗಳು ಹಾಗೂ 139 ಸಹಾಯವಾಣಿ ಮೂಲಕ ಒದಗಿಸಲಾಗುತ್ತಿದೆ.
NTES ಆ್ಯಂಡ್ರಾಯ್ಡ್ ಆ್ಯಪ್ 4.5 ಕೋಟಿಗೂ ಹೆಚ್ಚು ಹಾಗೂ ಐಒಎಸ್ ಆ್ಯಪ್ 16 ಲಕ್ಷಕ್ಕೂ ಅಧಿಕ ಡೌನ್ಲೋಡ್ಗಳನ್ನು ದಾಖಲಿಸಿದೆ.
ಶೇ.89 ಕಾಯ್ದಿರಿಸಿದ ಟಿಕೆಟ್ಗಳು ಆನ್ಲೈನ್
ರೈಲು ರದ್ದಾದ ಸಂದರ್ಭಗಳಲ್ಲಿ ಆನ್ಲೈನ್ ಇ-ಟಿಕೆಟ್ಗಳಿಗೆ ಸ್ವಯಂಚಾಲಿತ ಮರುಪಾವತಿ ವ್ಯವಸ್ಥೆಯನ್ನೂ ರೈಲ್ವೆ ಜಾರಿಗೊಳಿಸಿದೆ. ಕಾಯ್ದಿರಿಸಿದ ಟಿಕೆಟ್ಗಳ ಪೈಕಿ ಸುಮಾರು 89% ಈಗ ಆನ್ಲೈನ್ನಲ್ಲಿ ಬುಕ್ ಆಗುತ್ತಿದ್ದು, 2013-14ರಲ್ಲಿ ಇದು ಶೇ.49ರಷ್ಟಿತ್ತು. ಕಾಯ್ದಿರಿಸದ ಟಿಕೆಟ್ಗಳ ಕೌಂಟರ್ರಹಿತ ಬುಕಿಂಗ್ ಕೂಡ ಸುಮಾರು ಶೇ.39ಕ್ಕೆ ಏರಿಕೆಯಾಗಿದೆ.
