ಜಿನೀವಾ ಕ್ರೂಸ್ ಹಡಗಿನಲ್ಲಿ ಹ್ಯಾಂಟವೈರಸ್ ಮರಣ ಮೃದಂಗ: ಮೂವರ ಸಾವು
ಜಿನೀವಾ: ವಿಶ್ವ ಆರೋಗ್ಯ ಸಂಸ್ಥೆ (WHO) ಅಟ್ಲಾಂಟಿಕ್ ಸಾಗರದಲ್ಲಿ ಸಂಚರಿಸುತ್ತಿದ್ದ ಕ್ರೂಸ್ ಹಡಗಿನಲ್ಲಿ ಸಂಭವಿಸಿದ ಹ್ಯಾಂಟವೈರಸ್ ಸೋಂಕು ಪ್ರಕರಣಗಳ ಬಗ್ಗೆ ಆತಂಕ ವ್ಯಕ್ತಪಡಿಸಿದೆ. ಈ ಸೋಂಕಿಗೆ ಸಂಬಂಧಿಸಿದಂತೆ ಇದುವರೆಗೆ ಮೂವರು ಸಾವನ್ನಪ್ಪಿದ್ದು, ಒಬ್ಬರ ಸ್ಥಿತಿ ಗಂಭೀರವಾಗಿದೆ ಎಂದು ಸಂಸ್ಥೆ ತಿಳಿಸಿದೆ.
MV ಹೊಂಡಿಯಸ್ ಹೆಸರಿನ ಕ್ರೂಸ್ ಹಡಗು ಅರ್ಜೆಂಟೀನಾದಿಂದ ಕೇಪ್ ವರ್ಡೆಗೆ ಪ್ರಯಾಣಿಸುತ್ತಿದ್ದ ವೇಳೆ ಒಂದು ಹ್ಯಾಂಟವೈರಸ್ ಪ್ರಕರಣ ಪ್ರಯೋಗಾಲಯದಲ್ಲಿ ದೃಢಪಟ್ಟಿದ್ದು, ಇನ್ನೂ ಐದು ಶಂಕಿತ ಪ್ರಕರಣಗಳು ಪತ್ತೆಯಾಗಿವೆ.
WHO ಪ್ರಕಾರ, ಸೋಂಕಿತರಲ್ಲಿ ಮೂವರು ಮೃತಪಟ್ಟಿದ್ದು, 69 ವರ್ಷದ ಬ್ರಿಟಿಷ್ ಪ್ರಜೆ ದಕ್ಷಿಣ ಆಫ್ರಿಕಾದ ಜೋಹಾನ್ಸ್ಬರ್ಗ್ನಲ್ಲಿ ತೀವ್ರ ನಿಗಾ ಘಟಕದಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.
ಸೋಂಕಿನ ಮೂಲ, ಹರಡುವಿಕೆ ಹಾಗೂ ವೈರಸ್ನ ಸ್ವರೂಪ ತಿಳಿಯಲು ಪ್ರಯೋಗಾಲಯ ಪರೀಕ್ಷೆಗಳು ಮತ್ತು ಸಾಂಕ್ರಾಮಿಕ ರೋಗಶಾಸ್ತ್ರೀಯ ತನಿಖೆಗಳು ಮುಂದುವರಿದಿವೆ. ಹಡಗಿನಲ್ಲಿ ಇದ್ದ ಪ್ರಯಾಣಿಕರು ಮತ್ತು ಸಿಬ್ಬಂದಿಗೆ ವೈದ್ಯಕೀಯ ನೆರವು ಒದಗಿಸಲಾಗುತ್ತಿದೆ ಎಂದು WHO ತಿಳಿಸಿದೆ.
ಓಷನ್ವೈಡ್ ಎಕ್ಸ್ಪೆಡಿಶನ್ಸ್ ನಿರ್ವಹಿಸುವ MV ಹೊಂಡಿಯಸ್ ಹಡಗು ಮಾರ್ಚ್ 20ರಂದು ದಕ್ಷಿಣ ಅರ್ಜೆಂಟೀನಾದ ಉಶುಯಾದಿಂದ ಹೊರಟಿತ್ತು. 170 ಪ್ರಯಾಣಿಕರನ್ನು ಸಾಗಿಸುವ ಸಾಮರ್ಥ್ಯ ಹೊಂದಿರುವ ಈ ಹಡಗಿನಲ್ಲಿ 57 ಸಿಬ್ಬಂದಿ, 13 ಮಾರ್ಗದರ್ಶಕರು ಹಾಗೂ ಒಬ್ಬ ವೈದ್ಯರಿದ್ದರು.
WHO ಸದಸ್ಯ ರಾಷ್ಟ್ರಗಳು ಮತ್ತು ಹಡಗು ನಿರ್ವಾಹಕರೊಂದಿಗೆ ಸಮನ್ವಯ ಸಾಧಿಸಿ, ರೋಗ ಲಕ್ಷಣ ಹೊಂದಿರುವ ಪ್ರಯಾಣಿಕರ ವೈದ್ಯಕೀಯ ಸ್ಥಳಾಂತರ ಮತ್ತು ಉಳಿದ ಪ್ರಯಾಣಿಕರ ಆರೋಗ್ಯ ಮೇಲ್ವಿಚಾರಣೆಯನ್ನು ನಡೆಸುತ್ತಿದೆ.
