ರಾಜಮಾರ್ಗಯಾತ್ರೆ ಆ್ಯಪ್‌ನಲ್ಲಿ ಟೋಲ್ ಪ್ಲಾಜಾ ಪ್ರತಿಕ್ರಿಯೆ ವೈಶಿಷ್ಟ್ಯ ಪರಿಚಯಿಸಿದ NHAI
ನವದೆಹಲಿ: ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ಪ್ರಯಾಣಿಸುವವರ ಅನುಭವ ಸುಧಾರಿಸಲು ಭಾರತೀಯ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ (NHAI) ತನ್ನ ‘ರಾಜಮಾರ್ಗಯಾತ್ರೆ’ ಮೊಬೈಲ್ ಆ್ಯಪ್‌ನಲ್ಲಿ ‘ಟೋಲ್ ಪ್ಲಾಜಾ ಪ್ರತಿಕ್ರಿಯೆ’ ಎಂಬ ಹೊಸ ವೈಶಿಷ್ಟ್ಯವನ್ನು ಪರಿಚಯಿಸಿದೆ. ಈ ಮೂಲಕ ವಾಹನ ಸವಾರರು ಟೋಲ್ ಪ್ಲಾಜಾಗಳಲ್ಲಿನ ಸೇವೆಗಳ ಬಗ್ಗೆ ತಮ್ಮ ಅಭಿಪ್ರಾಯ ಹಂಚಿಕೊಳ್ಳಬಹುದು ಹಾಗೂ ಗಮನಹರಿಸಬೇಕಾದ ಸಮಸ್ಯೆಗಳನ್ನು ಪ್ರಾಧಿಕಾರದ ಗಮನಕ್ಕೆ ತರಬಹುದು.
ಹೆದ್ದಾರಿ ಪ್ರಯಾಣವನ್ನು ಸುರಕ್ಷಿತ, ಸುಗಮ ಮತ್ತು ಅನುಕೂಲಕರಗೊಳಿಸುವುದರ ಜತೆಗೆ, ಸೇವೆಗಳ ಸುಧಾರಣೆಯಲ್ಲಿ ನಾಗರಿಕರ ಪಾಲ್ಗೊಳ್ಳುವಿಕೆಯನ್ನು ಹೆಚ್ಚಿಸುವುದು ಈ ಉಪಕ್ರಮದ ಉದ್ದೇಶವಾಗಿದೆ ಎಂದು NHAI ತಿಳಿಸಿದೆ.
ಹೊಸ ವ್ಯವಸ್ಥೆಯಡಿ, ವಾರ್ಷಿಕ ಪಾಸ್ ಬಳಕೆದಾರರು ರಾಷ್ಟ್ರೀಯ ಹೆದ್ದಾರಿಯ ಟೋಲ್ ಪ್ಲಾಜಾವನ್ನು ದಾಟಿದ ಬಳಿಕ ರಾಜಮಾರ್ಗಯಾತ್ರೆ ಆ್ಯಪ್‌ನಲ್ಲಿ ಅಧಿಸೂಚನೆ ಪಡೆಯಲಿದ್ದಾರೆ. ಈ ಅಧಿಸೂಚನೆಯ ಮೂಲಕ ಅವರು ತಮ್ಮ ಪ್ರಯಾಣದ ಅನುಭವದ ಕುರಿತು ಪ್ರತಿಕ್ರಿಯೆ ಸಲ್ಲಿಸಬಹುದು. ಇತರ ಬಳಕೆದಾರರೂ ಆ್ಯಪ್‌ನ ಮೆನುವಿನಲ್ಲಿರುವ ‘ಟೋಲ್ ಪ್ಲಾಜಾ ಪ್ರತಿಕ್ರಿಯೆ’ ಆಯ್ಕೆಯನ್ನು ಬಳಸಿಕೊಂಡು ತಮಗೆ ಸಂಬಂಧಿಸಿದ ಟೋಲ್ ಪ್ಲಾಜಾದ ಬಗ್ಗೆ ಅಭಿಪ್ರಾಯ ಹಂಚಿಕೊಳ್ಳಬಹುದು.
ಬಳಕೆದಾರರು ತಮ್ಮ ಅನುಭವಕ್ಕೆ ಅನುಗುಣವಾಗಿ ರೇಟಿಂಗ್ ನೀಡಬಹುದು. ಪ್ರಯಾಣಕ್ಕೆ ಸಂಬಂಧಿಸಿದ ವಿವಿಧ ಆಯ್ಕೆಗಳನ್ನು ಗುರುತಿಸುವುದರ ಜತೆಗೆ, ಅಗತ್ಯವಿದ್ದರೆ ತಮ್ಮ ಅಭಿಪ್ರಾಯ ಅಥವಾ ಸಮಸ್ಯೆಯ ವಿವರಗಳನ್ನೂ ದಾಖಲಿಸಬಹುದು.
ರಾಷ್ಟ್ರೀಯ ಹೆದ್ದಾರಿ ಜಾಲದಾದ್ಯಂತ ಟೋಲ್ ಪ್ಲಾಜಾಗಳಲ್ಲಿ ಸೇವೆಗೆ ಸಂಬಂಧಿಸಿದ ಸಮಸ್ಯೆಗಳನ್ನು ಗುರುತಿಸಲು ಹಾಗೂ ಅವುಗಳ ಬಗ್ಗೆ ನಿಗಾ ವಹಿಸಲು ಈ ಪ್ರತಿಕ್ರಿಯೆಗಳು ನೆರವಾಗಲಿವೆ ಎಂದು ಪ್ರಾಧಿಕಾರ ತಿಳಿಸಿದೆ. ಪ್ರಯಾಣಿಕರಿಂದ ಲಭಿಸುವ ಮಾಹಿತಿಯ ಆಧಾರದಲ್ಲಿ ಸೇವೆಗಳಲ್ಲಿ ಸುಧಾರಣೆ ಅಗತ್ಯವಿರುವ ಕ್ಷೇತ್ರಗಳನ್ನು ಗುರುತಿಸಲು ಸಾಧ್ಯವಾಗಲಿದೆ.
ಹೆದ್ದಾರಿ ಬಳಕೆದಾರರು ಈ ವೈಶಿಷ್ಟ್ಯವನ್ನು ಸಕ್ರಿಯವಾಗಿ ಬಳಸಿಕೊಳ್ಳುವಂತೆ NHAI ಮನವಿ ಮಾಡಿದೆ. ನಾಗರಿಕರ ಪ್ರತಿಕ್ರಿಯೆ ಮತ್ತು ಪಾಲ್ಗೊಳ್ಳುವಿಕೆ ಟೋಲ್ ಪ್ಲಾಜಾಗಳಲ್ಲಿನ ಸಮಸ್ಯೆಗಳನ್ನು ಪರಿಹರಿಸಲು ಹಾಗೂ ಸೇವೆಗಳ ಗುಣಮಟ್ಟ ಹೆಚ್ಚಿಸಲು ಸಹಕಾರಿಯಾಗಲಿದೆ ಎಂದು ಪ್ರಾಧಿಕಾರ ವಿಶ್ವಾಸ ವ್ಯಕ್ತಪಡಿಸಿದೆ.
