ಜಿಎಸ್ಟಿ ಸುಧಾರಣೆ: ಪ್ರಧಾನಿ ಮೋದಿ ನಾಯಕತ್ವಕ್ಕೆ ಗಣ್ಯರಿಂದ ಶ್ಲಾಘನೆ
ನವದೆಹಲಿ: ಜಿಎಸ್ಟಿ ದರ ಇಳಿಕೆ ಮತ್ತು ಪ್ರಕ್ರಿಯೆ ಸುಧಾರಣೆಗಳನ್ನು ಘೋಷಿಸಿದ ಪ್ರಧಾನಿ ನರೇಂದ್ರ ಮೋದಿ ಅವರ ನಾಯಕತ್ವಕ್ಕೆ ಕೇಂದ್ರದ ಹಲವಾರು ಸಚಿವರು ಹಾಗೂ ಬಿಜೆಪಿ ನಾಯಕರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ಗೃಹ ಸಚಿವ ಅಮಿತ್ ಶಾ ಅವರು, “ಬಡವರು, ಮಧ್ಯಮ ವರ್ಗ, ರೈತರು, ಮಹಿಳೆಯರು ಹಾಗೂ ಸಣ್ಣ ವ್ಯಾಪಾರಿಗಳಿಗೆ ಇದು ದೊಡ್ಡ ಪರಿಹಾರ. ಸಾಮಾನ್ಯ ನಾಗರಿಕರ ಮೇಲಿನ ಹೊರೆಯನ್ನು ಕಡಿಮೆ ಮಾಡುವ ಈ ತೀರ್ಮಾನ ನಿಜವಾಗಿಯೂ ಪರಿವರ್ತನಾತ್ಮಕ” ಎಂದು ಹೇಳಿದ್ದಾರೆ.
ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಇದನ್ನು “ಧೈರ್ಯಶಾಲಿ ನಿರ್ಧಾರ” ಎಂದು ಕರೆಯುತ್ತಾ, “ಜೀವನ ಮತ್ತು ವ್ಯಾಪಾರ ಸುಲಭವಾಗಲು ಈ ಸುಧಾರಣೆ ದಾರಿಯಾಗಿದೆ” ಎಂದು ಪ್ರಧಾನಿ ಮೋದಿ ಹಾಗೂ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರಿಗೆ ಧನ್ಯವಾದ ತಿಳಿಸಿದ್ದಾರೆ.
ವಿದೇಶಾಂಗ ಸಚಿವ ಎಸ್. ಜೈಶಂಕರ್ ಅವರು, “NextGen GST ಸುಧಾರಣೆಗಳು ದೇಶದಲ್ಲಿ ನಡೆಯುತ್ತಿರುವ ಪರಿವರ್ತನೆಗೆ ಬಲ ನೀಡುತ್ತವೆ” ಎಂದು ಹೇಳಿ, ಮೋದಿ ಹಾಗೂ ನಿರ್ಮಲಾ ಅವರನ್ನು ಅಭಿನಂದಿಸಿದ್ದಾರೆ.
ಬಿಜೆಪಿ ಅಧ್ಯಕ್ಷ ಜೆ.ಪಿ. ನಡ್ಡಾ ಅವರು, “ಈ ನಿರ್ಧಾರ ಮಧ್ಯಮ ವರ್ಗದ ಕುಟುಂಬಗಳಿಗೆ ಸಹಾಯ ಮಾಡುತ್ತದೆ, ಸಣ್ಣ ವ್ಯಾಪಾರಿಗಳನ್ನು ಸಬಲೀಕರಿಸುತ್ತದೆ. #ViksitBharat ಕನಸಿಗೆ ಬಲ ನೀಡುತ್ತದೆ” ಎಂದು ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಂಡಿದ್ದಾರೆ.
ಕೃಷಿ ಸಚಿವ ಶಿವರಾಜ್ ಸಿಂಗ್ ಚೌಹಾಣ್ ಅವರು, “1.44 ಶತಕೋಟಿ ಭಾರತೀಯರ ಜೀವನವನ್ನು ಸುಲಭಗೊಳಿಸುವ ಐತಿಹಾಸಿಕ ತೀರ್ಮಾನ. ದೀಪಾವಳಿಯ ಮುನ್ನ ಪ್ರಧಾನಿ ನೀಡಿದ ಮಹತ್ವದ ಉಡುಗೊರೆ ಇದು” ಎಂದು ತಿಳಿಸಿದ್ದಾರೆ.
