ಮಧ್ಯಪ್ರಾಚ್ಯ ಸಂಘರ್ಷದ ಕಾಟ: 2,100ಕ್ಕೂ ಹೆಚ್ಚು ಮಕ್ಕಳು ಸಾವು–ಗಾಯ – ಯುಎನ್
ವಿಶ್ವಸಂಸ್ಥೆ: ಮಧ್ಯಪ್ರಾಚ್ಯದಲ್ಲಿ ಉಲ್ಬಣಗೊಂಡಿರುವ ಸಂಘರ್ಷದ ಪರಿಣಾಮವಾಗಿ 2,100ಕ್ಕೂ ಹೆಚ್ಚು ಮಕ್ಕಳು ಸಾವನ್ನಪ್ಪಿದ್ದಾರೆ ಅಥವಾ ಗಾಯಗೊಂಡಿದ್ದಾರೆ ಎಂದು UNICEF ಉಪ ಕಾರ್ಯನಿರ್ವಾಹಕ ನಿರ್ದೇಶಕ ಟೆಡ್ ಚೈಬನ್ ತಿಳಿಸಿದ್ದಾರೆ.
ನ್ಯೂಯಾರ್ಕ್ನ ವಿಶ್ವಸಂಸ್ಥೆ ಪ್ರಧಾನ ಕಚೇರಿಯಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, “ಕೇವಲ 23 ದಿನಗಳಲ್ಲೇ ಪ್ರದೇಶದಾದ್ಯಂತ ಮಕ್ಕಳು ಭಾರೀ ಬೆಲೆ ಕಟ್ಟುತ್ತಿದ್ದಾರೆ. ಈ ಸಂಘರ್ಷ ಇನ್ನಷ್ಟು ವಿಸ್ತರಿಸಿದರೆ ಲಕ್ಷಾಂತರ ಜನರಿಗೆ ಮಹಾ ದುರಂತವಾಗಲಿದೆ” ಎಂದು ಎಚ್ಚರಿಸಿದರು.
ಮಕ್ಕಳ ಸಾವುನೋವುಗಳ ವಿವರ ನೀಡಿದ ಚೈಬನ್, ಇರಾನ್ನಲ್ಲಿ 206, ಲೆಬನಾನ್ನಲ್ಲಿ 118, ಇಸ್ರೇಲ್ನಲ್ಲಿ 4 ಮತ್ತು ಕುವೈತ್ನಲ್ಲಿ 1 ಮಗು ಸಾವನ್ನಪ್ಪಿದೆ ಎಂದು ಹೇಳಿದರು. “ಯುದ್ಧ ಆರಂಭವಾದ ಬಳಿಕ ಪ್ರತಿದಿನ ಸರಾಸರಿ 87 ಮಕ್ಕಳು ಸಾವನ್ನಪ್ಪುತ್ತಿದ್ದಾರೆ ಅಥವಾ ಗಾಯಗೊಳ್ಳುತ್ತಿದ್ದಾರೆ” ಎಂದು ಅವರು ವಿವರಿಸಿದರು.
ಸಂಘರ್ಷದ ಪರಿಣಾಮವಾಗಿ ವ್ಯಾಪಕ ಮಟ್ಟದಲ್ಲಿ ಸ್ಥಳಾಂತರವೂ ನಡೆದಿದೆ. ಇರಾನ್ನಲ್ಲಿ ಸುಮಾರು 3.2 ಮಿಲಿಯನ್ ಜನರು, ಅದರಲ್ಲೂ 8.64 ಲಕ್ಷ ಮಕ್ಕಳು ಸ್ಥಳಾಂತರಗೊಂಡಿದ್ದಾರೆ. ಲೆಬನಾನ್ನಲ್ಲಿ 10 ಲಕ್ಷಕ್ಕೂ ಹೆಚ್ಚು ಜನರು, ಸುಮಾರು 3.7 ಲಕ್ಷ ಮಕ್ಕಳು ಸೇರಿ, ತಮ್ಮ ಮನೆಗಳನ್ನು ತೊರೆಯಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ.
ಮಧ್ಯಪ್ರಾಚ್ಯದಾದ್ಯಂತ ಸಂಘರ್ಷ ಉಲ್ಬಣಗೊಳ್ಳುವ ಮೊದಲುಲೇ ಸುಮಾರು 4.48 ಕೋಟಿ ಮಕ್ಕಳು ಸಂಘರ್ಷಪೀಡಿತ ಪ್ರದೇಶಗಳಲ್ಲಿ ವಾಸಿಸುತ್ತಿದ್ದರು ಎಂದು ಅವರು ತಿಳಿಸಿದರು.
ಲೆಬನಾನ್ ಭೇಟಿಯ ಅನುಭವ ಹಂಚಿಕೊಂಡ ಚೈಬನ್, “ಅಲ್ಲಿ ಕಂಡ ಪರಿಸ್ಥಿತಿ ಅತ್ಯಂತ ಭಯಾನಕ. ತಕ್ಷಣದ ಮತ್ತು ಸಮಗ್ರ ಜಾಗತಿಕ ಪ್ರತಿಕ್ರಿಯೆ ಅಗತ್ಯವಿದೆ” ಎಂದರು. 350ಕ್ಕೂ ಹೆಚ್ಚು ಸರ್ಕಾರಿ ಶಾಲೆಗಳನ್ನು ಆಶ್ರಯ ಕೇಂದ್ರಗಳಾಗಿ ಬಳಸಲಾಗುತ್ತಿದ್ದು, ಸುಮಾರು 1 ಲಕ್ಷ ಮಕ್ಕಳ ಶಿಕ್ಷಣ ವ್ಯತ್ಯಯಗೊಂಡಿದೆ ಎಂದು ಅವರು ಹೇಳಿದರು.
ಮಾನವೀಯ ನೆರವಿನ ಭಾಗವಾಗಿ, ಯುನಿಸೆಫ್ 250ಕ್ಕೂ ಹೆಚ್ಚು ಆಶ್ರಯ ಕೇಂದ್ರಗಳಿಗೆ ಅಗತ್ಯ ವಸ್ತುಗಳನ್ನು ತಲುಪಿಸಿದ್ದು, 1.51 ಲಕ್ಷಕ್ಕೂ ಹೆಚ್ಚು ಸ್ಥಳಾಂತರಿತರಿಗೆ ಸಹಾಯ ಮಾಡುತ್ತಿದೆ. ಅಲ್ಲದೆ, 188 ಆಶ್ರಯ ಕೇಂದ್ರಗಳಲ್ಲಿ ಸುಮಾರು 46,000 ಜನರಿಗೆ ನೀರು ಮತ್ತು ಸ್ವಚ್ಛತಾ ಸೌಲಭ್ಯಗಳನ್ನು ಒದಗಿಸಲಾಗಿದೆ.
ಆದರೆ, “ಅಗತ್ಯಗಳು ಲಭ್ಯವಿರುವ ಸಂಪನ್ಮೂಲಗಳಿಗಿಂತ ವೇಗವಾಗಿ ಹೆಚ್ಚುತ್ತಿವೆ” ಎಂದು ಎಚ್ಚರಿಸಿದ ಅವರು, “ಅಂತರರಾಷ್ಟ್ರೀಯ ಮಾನವೀಯ ಕಾನೂನುಗಳನ್ನು ಎಲ್ಲರೂ ಪಾಲಿಸಬೇಕು. ಯುದ್ಧಕ್ಕೆ ತಕ್ಷಣ ತಣ್ಣನೆ ಮತ್ತು ರಾಜಕೀಯ ಪರಿಹಾರ ಅಗತ್ಯ” ಎಂದು ಕರೆ ನೀಡಿದರು.
