ಶತ್ರುಗಳಿಗಿಂತ ಹವಾಮಾನದ ಜತೆಗೆ ಯುದ್ಧ; 30 ವರ್ಷದಲ್ಲಿ 869 ಸೈನಿಕರು ಬಲಿ
ಧಾರವಾಡ ಜಿಲ್ಲೆ ಬೆಟದೂರಿನ ಯೋಧ ಹನುಮಂತಪ್ಪ ಕೊಪ್ಪದ ಅವರು ಪವಾಡ ಸದೃಶ ರೀತಿಯಲ್ಲಿ ಪಾರಾಗುವುದರೊಂದಿಗೆ ಹಾಗೂ 9 ಯೋಧರು ಹಿಮಸಮಾಧಿಯಾಗುವುದರೊಂದಿಗೆ ಜಗತ್ತಿನ ಅತ್ಯಂತ ಎತ್ತರದ ಯುದ್ಧ ಭೂಮಿ ಸಿಯಾಚಿನ್‌ ಮತ್ತೂಮ್ಮೆ ಸುದ್ದಿಯಲ್ಲಿದೆ. ಸಿಯಾಚಿನ್‌ನಲ್ಲಿ 80ರ ದಶಕದಿಂದ ಈವರೆಗೆ 869 ಭಾರತೀಯ ಯೋಧರು ಪ್ರಾಣ ಕಳೆದುಕೊಂಡಿದ್ದಾರೆ.ಇವರ ಸಾವಿಗೆ ಶತ್ರುಪಡೆಗಳು ಹಾರಿಸಿದ ಗುಂಡು, ಸಿಡಿಸಿದ ಬಾಂಬ್‌ ಕಾರಣವಲ್ಲ. ಬದಲಿಗೆ ಸಹಿಸಿಕೊಳ್ಳಲಾಗದಷ್ಟು ಚಳಿ ಹೊಂದಿರುವ ಪ್ರತಿಕೂಲ ಹವಾಮಾನ, ದಿಢೀರ್‌ ಹಿಮ ಕುಸಿತದಂತಹ ಘಟನೆಗಳು. ಯೋಧರ ಪಾಲಿಗೆ ಮರಣಶಯ್ಯೆಯಾಗಿರುವ ಸಿಯಾಚಿನ್‌ ಬಗ್ಗೆ ಒಂದಿಷ್ಟು ಮಾಹಿತಿ ಇಲ್ಲಿದೆ.
ಎಲ್ಲಿದೆ ಸಿಯಾಚಿನ್‌?
ಜಮ್ಮು-ಕಾಶ್ಮೀರದ ಲಡಾಕ್‌ ಪ್ರಾಂತ್ಯದಲ್ಲಿ, ಭಾರತದ ಗಡಿಯ ತುತ್ತತುದಿಯಲ್ಲಿದೆ. ಸಮುದ್ರ ಮಟ್ಟದಿಂದ 21 ಸಾವಿರ ಅಡಿ ಎತ್ತರದಲ್ಲಿದೆ. ಕರ್ನಾಟಕದ ಅತಿ ಎತ್ತರದ ಪರ್ವತ ಚಿಕ್ಕಮಗಳೂರಿನ ಮುಳ್ಳಯ್ಯನಗಿರಿ 6330 ಅಡಿ ಇದ್ದರೆ, ಸಿಯಾಚಿನ್‌ನ ಎತ್ತರ ಅದಕ್ಕಿಂತ ಮೂರು ಪಟ್ಟು ಅಧಿಕ. ಭಾರತ ಹಾಗೂ ಪಾಕಿಸ್ತಾನ ನಡುವಣ ಗಡಿ ನಿಯಂತ್ರಣ ರೇಖೆ ಅಂತ್ಯವಾಗುವುದು ಇಲ್ಲೇ. ಜಮ್ಮು-ಕಾಶ್ಮೀರ ರಾಜಧಾನಿ ಶ್ರೀನಗರದಿಂದ ಸಿಯಾಚಿನ್‌ಗೆ 250 ಕಿ.ಮೀ. ದೂರ
ಸಿಯಾಚಿನ್‌ ಏಕೆ ಕಾಯಬೇಕು?
1949ರ ಕರಾಚಿ ಒಪ್ಪಂದ ಮತ್ತು 1972ರ ಶಿಮ್ಲಾ ಒಪ್ಪಂದದ ಪ್ರಕಾರ, ಭಾರತ- ಪಾಕ್‌ ಗಡಿ ನಿಯಂತ್ರಣ ರೇಖೆಯ ಅತ್ಯಂತ ಉತ್ತರ ತುದಿಯಲ್ಲಿರುವ ಸಿಯಾಚಿನ್‌ ಅನ್ನು ಮನುಷ್ಯ ವಾಸಕ್ಕೆ ಯೋಗ್ಯವಲ್ಲದ ಪ್ರದೇಶ ಎಂದು ಒಪ್ಪಿಕೊಳ್ಳಲಾಯಿತು. ಆದರೆ ಈ ಒಪ್ಪಂದಕ್ಕೆ ವಿರುದ್ಧವಾಗಿ ಸಿಯಾಚಿನ್‌ ಹಿಮಪರ್ವತವನ್ನು ವಶಕ್ಕೆ ತೆಗೆದುಕೊಳ್ಳಲು ಪಾಕ್‌ ಪ್ರಯತ್ನ ಆರಂಭಿಸಿತು. ಈ ಹಿನ್ನೆಲೆಯಲ್ಲಿ ಭಾರತೀಯ ಸೇನೆಯನ್ನು 1984ರಲ್ಲಿ ನಿಯೋಜಿಸಲಾಯಿತು. ಪಾಕ್‌ ಸೈನಿಕರು ಸಿಯಾಚಿನ್‌ಗೆ ಹೋಗಿ ಅಲ್ಲಿ ಠಿಕಾಣಿ ಹೂಡುವ ಮೊದಲೇ ಭಾರತೀಯ ಸೈನಿಕರು ತೆರಳಿ ಸಿಯಾಚಿನ್‌ ಮೇಲೆ ಪ್ರಭುತ್ವ ಸಾಧಿಸಿದ್ದರು. ಅಂದಿನಿಂದಲೂ ಸಿಯಾಚಿನ್‌ ಅನ್ನು ಭಾರತದ ಯೋಧರು ರಕ್ಷಿಸುತ್ತಿದ್ದಾರೆ. ಅತ್ತ ಪಾಕ್‌ ಆಕ್ರಮಿತ ಕಾಶ್ಮೀರದ ಭಾಗಕ್ಕೆ ಬರುವ ಸಿಯಾಚಿನ್‌ ಪರ್ವತವನ್ನು ಪಾಕ್‌ ಕಾವಲು ಕಾಯುತ್ತಿದೆ. ಪಾಕ್‌ ವಶಪಡಿಸಬಹುದು ಎಂಬ ಕಾರಣಕ್ಕೆ ಕೇಂದ್ರ ಸರ್ಕಾರ ಯೋಧರನ್ನು ವಾಪಸ್‌ ಕರೆಸಿಕೊಳ್ಳಲು ಹಿಂದೇಟು ಹಾಕುತ್ತಿದೆ.
ಹೇಗಿದೆ ವಾತಾವರಣ?
ಕನಿಷ್ಠ ಉಷ್ಣಾಂಶ 20 ಡಿಗ್ರಿಗಿಂತ ಕೆಳಕ್ಕಿಳಿದರೆ ಸಾಕು ಕರ್ನಾಟಕದ ಜನ ನಡುಗುತ್ತಾರೆ. ಆದರೆ ಸಿಯಾಚಿನ್‌ನಲ್ಲಿ ಕನಿಷ್ಠ ಉಷ್ಣಾಂಶ ಮೈನಸ್‌ 50 ಡಿಗ್ರಿ ಸೆಲ್ಸಿಯಸ್‌ವರೆಗೂ ಇರುತ್ತದೆ. ನೆನಪಿಡಿ,ಉಷ್ಣಾಂಶ ಶೂನ್ಯ ಡಿಗ್ರಿಗೆ ಕುಸಿಯುತ್ತಿದ್ದಂತೆ ನೀರು ಹೆಪ್ಪುಗಟ್ಟುತ್ತದೆ.ಅಂತಹದ್ದರಲ್ಲಿ ಸಿಯಾಚಿನ್‌ನಲ್ಲಿ ಪರಿಸ್ಥಿತಿ ಯಾವ ಮಟ್ಟಿಗಿರಬೇಕು? ಜತೆಗೆ ಇಲ್ಲಿ 1000 ಸೆಂ.ಮೀ.ನಷ್ಟು ಹಿಮಪಾತ ಕೂಡ ಆಗುತ್ತದೆ.
3 ತಿಂಗಳಿಗೊಮ್ಮೆಯೋಧರ ಬದಲಾವಣೆ
ಸಿಯಾಚಿನ್‌ನಲ್ಲಿ ಒಬ್ಬ ಯೋಧ ಗರಿಷ್ಠ ಮೂರು ತಿಂಗಳು ಮಾತ್ರವೇ ಗಡಿ ಕಾಯಬಹುದು. ಈ ಅವಧಿ ಮುಗಿಯುತ್ತಿದ್ದಂತೆ ಸೇನೆ ಬೇರೆ ಯೋಧನನ್ನು ನಿಯೋಜಿಸುತ್ತದೆ. ಬಾನಾ ಪೋಸ್ಟ್‌ ಎಂಬ ಅತ್ಯಂತ ಅಪಾಯಕಾರಿ ಸ್ಥಳದಲ್ಲಿ ಪ್ರತಿ ತಿಂಗಳಿಗೊಮ್ಮೆ ಯೋಧರನ್ನು ಬದಲಿಸಲಾಗುತ್ತದೆ. ಪ್ರತಿ ಆರು ತಿಂಗಳಿಗೊಮ್ಮೆ ಸೇನಾ ತುಕಡಿಯನ್ನೇ ಎತ್ತಂಗಡಿ ಮಾಡಲಾಗುತ್ತದೆ. ಇಲ್ಲಿ ಕಾರ್ಯನಿರ್ವಹಿಸುವ ಸೇನಾಧಿಕಾರಿಗಳಿಗೆ ಸಿಯಾಚಿನ್‌ ಭತ್ಯೆಯಾಗಿ ತಿಂಗಳಿಗೆ 21,000 ರೂ. ಮತ್ತು ಸೈನಿಕರಿಗೆ 14,000 ರೂ.ನೀಡಲಾಗುತ್ತದೆ.
ಇಲ್ಲಿ ಅಸುನಿಗುವುದೇಕೆ?
ಉಷ್ಣಾಂಶ ಮೈನಸ್‌ 50 ಡಿಗ್ರಿವರೆಗೂ ಕುಸಿಯುವುದರಿಂದ ಮೂಳೆ ನಡುಗಿಸುವಂತಹ ಚಳಿ ಇಲ್ಲಿರುತ್ತದೆ. ಜತೆಗೆ ಸೂರ್ಯನ ಶಾಖ ಬಿದ್ದರೆ ಚರ್ಮ ಸುಟ್ಟುಹೋಗುತ್ತದೆ. ಶೂನ್ಯಕ್ಕಿಂತ ಕೆಳಗಿನ ತಾಪಮಾನ ಹಾಗೂ ಶೀತ ಗಾಳಿಯಿಂದಾಗಿ ಯೋಧರು ಖನ್ನತೆಗೂ ಒಳಗಾಗುತ್ತಾರೆ. ಇಲ್ಲಿ ಮಾತನಾಡಲೂ ಯೋಧರು ಕಷ್ಟಪಡಬೇಕಾದ ಪರಿಸ್ಥಿತಿ ಇದೆ.
ಸೆಕೆಂಡಿಗೆ 18 ಸಾವಿರ ರೂ. ವೆಚ್ಚ
ಸಿಯಾಚಿನ್‌ನಲ್ಲಿ ಯೋಧರಿಗೆ ಅಗತ್ಯ ವಸ್ತುಗಳನ್ನು ಪೂರೈಸಲು ಭಾರತ ನಿತ್ಯ ಸುಮಾರು 6.8 ಕೋಟಿ ರೂ. ಖರ್ಚು ಮಾಡುತ್ತದೆ. ಅಂದರೆ, ಪ್ರತಿ ಸೆಕೆಂಡಿಗೆ 18 ಸಾವಿರ ರೂಪಾಯಿ. ಇಷ್ಟು ಮೊತ್ತವಿದ್ದರೆ ಪ್ರತಿ ವರ್ಷ 4 ಸಾವಿರ ಪ್ರೌಢಶಾಲೆ ಅಥವಾ 30 ವರ್ಷ ಅವಧಿಯಲ್ಲಿ 1.72 ಲಕ್ಷ ಇತರೆ ಶಾಲೆಗಳನ್ನು ದೇಶದಲ್ಲಿ ಸ್ಥಾಪಿಸಬಹುದು! ದೇಶದಲ್ಲಿ ಒಂದು ರೋಟಿ ತಯಾರಿಸಲು ಎರಡು ರೂ. ಖರ್ಚು ತಗಲಿದರೆ ಅದನ್ನು ಸಿಯಾಚಿನ್‌ಗೆ ಕಳುಹಿಸಲು ತಗಲುವ ವೆಚ್ಚ ತಲಾ 200 ರೂಪಾಯಿ!
4 ವರ್ಷದ ಹಿಂದೆ ಪಾಕ್‌ನ 140 ಮಂದಿ ಸತ್ತಿದ್ದರು
2012ರ ಏ.7ರಂದು ಪಾಕ್‌ ಆಕ್ರಮಿತ ಕಾಶ್ಮೀರದ ವ್ಯಾಪ್ತಿಯಲ್ಲಿರುವ ಸಿಯಾಚಿನ್‌ ಭಾಗದ ಒಂದು ಕಡೆ ಹಿಮ ಕುಸಿದು ಪಾಕಿಸ್ತಾನದ 129 ಯೋಧರು ಹಾಗೂ 11 ನಾಗರಿಕರು ಸಾವನ್ನಪ್ಪಿದ್ದರು.
