ಮಹಿಳಾಮಣಿಗಳೇ ನಿರ್ಮಿಸಿರುವ “ರಿಂಗ್ ರೋಡ್ ಸುಮಾ”
ರಿಂಗ್ ರೋಡ್ ಸುಮಾ ಚಿತ್ರದ ನಿರ್ಮಾಣ ಹಂತದಿಂದ ಹಿಡಿದು ಬಿಡುಗಡೆಯಾಗುವವರೆಗೂ ಒಂದಿಲ್ಲೊಂದು ವಿಚಾರಗಳಿಗಾಗಿ ಸದ್ದು ಮಾಡುತ್ತಲೇ ಬಂದಿದೆ. ಅಂತು ಇಂತು ಚಿತ್ರ ತೆರೆ ಕಂಡಿದೆ.
ರಿಂಗ್ ರೋಡ್ ಸುಮಾ ಚಿತ್ರದ ಎಲ್ಲಾ ವಿಭಾಗಗಳಲ್ಲಿಯೂ ಮಹಿಳೆಯರೇ ಕಾರ್ಯ ನಿರ್ವಹಿಸಿರುವುದು ಈ ಚಿತ್ರದ ವಿಶೇಷ. ಸುಂದರ ರೂಪದ ಮಹಿಳೆಯ ಕರಾಳ ಮನಸ್ಸಿನ ಕಥೆ ಇದಾಗಿದ್ದು ರಂಜನಿ ರವೀಂದ್ರ ಈ ಚಿತ್ರವನ್ನು ನಿರ್ಮಿಸಿದ್ದಾರೆ.
ಸುಮಾರು 12 ವರ್ಷಗಳ ಹಿಂದಿನ, ರಿಂಗ್ ರೋಡ್ ನಲ್ಲಿ ತನ್ನ ಭಾವಿ ಪತಿಯನ್ನು ಮೊಸದಿಂದ ನಿರ್ದಾಕ್ಷಿಣ್ಯವಾಗಿ ಕೊಲೆ ಮಾಡಿಸಿದ ಹಂತಕಿ ಶುಭಾಳ ಕಥೆಯನ್ನು ಪ್ರೇರಣೆಯಾಗಿಟ್ಟುಕೊಂಡು ಅದಕ್ಕೊಂದಿಷ್ಟು ಮಸಾಲೆ, ರಂಜನೀಯ ಅಂಶಗಳನ್ನು ಸೇರಿಸಿ ನಿರ್ಮಿಸಿರುವ ಚಿತ್ರ ರಿಂಗ್ ರೋಡ್.
ಆರಂಭದಲ್ಲಿ ಈ ಚಿತ್ರಕ್ಕೆ ರಿಂಗ್ ರೋಡ್ ಶುಭ ಎಂದು ಶೀರ್ಷಿಕೆ ಇಟ್ಟಾಗ ಸಾಕಷ್ಟು ಪ್ರತಿರೋಧಗಳು ವ್ಯಕ್ತವಾದ ಹಿನ್ನೆಲೆಯಲ್ಲಿ ರಿಂಗ್ ರೋಡ್ ಸುಮ ಅಂತ ಬದಲಾವಣೆ ಮಾಡಲಾಯಿತು. ಆದರೆ ಆ ಹೆಸರಿನಲ್ಲಿಯೂ ಕೂಡ ಒಬ್ಬ ಹಂತಕಿ ಇದ್ದದ್ದರಿಂದ ಅಂತಿಮವಾಗಿ ಕೇವಲ ರಿಂಗ್ ರೋಡ್ ಮಾತ್ರ ಇರಲಿ ಎಂದು ಚಿತ್ರತಂಡ ನಿರ್ಧರಿಸಿ, ಅದೇ ಶೀರ್ಷಿಕೆಯೊಂದಿಗೆ ಈಗ ಚಿತ್ರವನ್ನು ರಿಲೀಸ್ ಮಾಡಿದೆ.
ಮುಂಬೈ ಮೂಲದ ಸುಂದರಿ ಖುಷಿ ಚಿತ್ರದಲ್ಲಿ ನಾಯಕಿ ಪಾತ್ರವನ್ನು ನಿರ್ವಹಿಸಿದ್ದಾರೆ.
ಪ್ರಿಯಾ ಬೆಳ್ಳಿಯಪ್ಪ ಈ ಚಿತ್ರದ ನಿರ್ದೇಶಕಿ. ಈ ಹಿಂದೆ ಮತ್ತೆ ಬನ್ನಿ ಪ್ರೀತ್ಸೋಣ ಚಿತ್ರದಲ್ಲಿ ಸಹ ನಿರ್ದೇಶಕಿಯಾಗಿ ಕಾರ್ಯ ನಿರ್ವಹಿಸಿದ್ದ ಪ್ರಿಯಾ ಬೆಳ್ಳಿಯಪ್ಪ ಅವರಿಗಿದು ಮೊದಲ ಪ್ರಯತ್ನ. ನಟ ದುನಿಯಾ ವಿಜಯ್ ಹಾಗೂ ಬೆಡಗಿ ನಿಖಿತಾ ತುಕ್ರಾಲ್ ಜೋಡಿ ಆದರ್ಶ ದಂಪತಿಗಳಾಗಿ ಈ ಚಿತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.
ಒಟ್ಟಿನಲ್ಲಿ ಮಹಿಳಾಮಣಿಗಳೇ ನಿರ್ಮಿಸಿರುವ ನೈಜ ಘಟನೆಯಾಧಾರಿತ ರಿಂಗ್ ರೋಡ್ ಎಷ್ಟರಮಟ್ಟಿಗೆ ಪ್ರೇಕ್ಷಕರನ್ನು ಮೋಡಿ ಮಾಡಲಿದೆ ಎಂದು ಕಾದುನೋಡಬೇಕಿದೆ.
