ಸ್ಟಾರ್ಟಪ್ ಕ್ಷೇತ್ರಕ್ಕೆ ಕೇಂದ್ರದ ಬಂಪರ್; ಬರೋಬ್ಬರಿ ₹10,000 ಕೋಟಿ ನಿಧಿ
ನವದೆಹಲಿ, ಫೆ.14: ದೇಶದ ವೇಗವಾಗಿ ಬೆಳೆಯುತ್ತಿರುವ ನವೋದ್ಯಮ ಪರಿಸರ ವ್ಯವಸ್ಥೆಗೆ ಮತ್ತೊಂದು ಉತ್ತೇಜನವಾಗಿ, ಪ್ರಧಾನಿ ನರೇಂದ್ರ ಮೋದಿ ಅಧ್ಯಕ್ಷತೆಯಲ್ಲಿ ನಡೆದ ಕೇಂದ್ರ ಸಚಿವ ಸಂಪುಟವು ₹10,000 ಕೋಟಿ ಮೊತ್ತದ ‘ಸ್ಟಾರ್ಟ್ಅಪ್ ಇಂಡಿಯಾ ನಿಧಿ 2.0’ (FoF 2.0) ಸ್ಥಾಪನೆಗೆ ಅನುಮೋದನೆ ನೀಡಿದೆ.
ಹೊಸ ನಿಧಿಯು ದೀರ್ಘಾವಧಿಯ ದೇಶೀಯ ಬಂಡವಾಳವನ್ನು ಸಜ್ಜುಗೊಳಿಸಿ, ದೇಶಾದ್ಯಂತ ನವೋದ್ಯಮಗಳಿಗೆ ಬಲವಾದ ಆರ್ಥಿಕ ಬೆಂಬಲ ಒದಗಿಸುವ ಗುರಿಯನ್ನು ಹೊಂದಿದೆ. ಸಾಹಸೋದ್ಯಮ ಬಂಡವಾಳ (ವೆಂಚರ್ ಕ್ಯಾಪಿಟಲ್) ಪರಿಸರ ವ್ಯವಸ್ಥೆಯನ್ನು ಬಲಪಡಿಸುವ ಮೂಲಕ ನವೀನತೆ ಆಧಾರಿತ ಉದ್ಯಮಶೀಲತೆಯನ್ನು ಉತ್ತೇಜಿಸುವ ಉದ್ದೇಶ ಈ ಯೋಜನೆಯಲ್ಲಿದೆ.
2016ರಲ್ಲಿ ಆರಂಭವಾದ ಸ್ಟಾರ್ಟ್ಅಪ್ ಇಂಡಿಯಾ ಉಪಕ್ರಮದ ಅಡಿಯಲ್ಲಿ ಜಾರಿಗೆ ಬಂದ ಮೊದಲ ಹಂತದ ‘ಫಂಡ್ ಆಫ್ ಫಂಡ್ಸ್’ (FFS 1.0) ಯಶಸ್ಸಿನ ಮೇಲೆ ಈ ಯೋಜನೆ ರೂಪಿಸಲಾಗಿದೆ. ಮೊದಲ ಹಂತದಲ್ಲಿ ₹10,000 ಕೋಟಿ ಕಾರ್ಪಸ್ ಅನ್ನು 145 ಪರ್ಯಾಯ ಹೂಡಿಕೆ ನಿಧಿಗಳಿಗೆ (AIF) ಬದ್ಧಗೊಳಿಸಲಾಗಿದ್ದು, ಅವುಗಳು 1,370ಕ್ಕೂ ಹೆಚ್ಚು ಸ್ಟಾರ್ಟ್ಅಪ್ಗಳಲ್ಲಿ ಒಟ್ಟಾರೆ ₹25,500 ಕೋಟಿಗೂ ಅಧಿಕ ಹೂಡಿಕೆ ಮಾಡಿವೆ.
ಕೈಗಾರಿಕೆ ಮತ್ತು ಆಂತರಿಕ ವ್ಯಾಪಾರ ಉತ್ತೇಜನ ಇಲಾಖೆ (DPIIT) ಗುರುತಿಸಿರುವ ಸ್ಟಾರ್ಟ್ಅಪ್ಗಳ ಸಂಖ್ಯೆ 2016ರಲ್ಲಿ 500ಕ್ಕೂ ಕಡಿಮೆ ಇದ್ದದ್ದು ಈಗ 2 ಲಕ್ಷಕ್ಕೂ ಅಧಿಕವಾಗಿದೆ. 2025ರಲ್ಲಿ ಇತಿಹಾಸದಲ್ಲೇ ಅತಿ ಹೆಚ್ಚು ವಾರ್ಷಿಕ ನೋಂದಣಿಗಳು ದಾಖಲಾಗಿವೆ ಎಂದು ಸರ್ಕಾರ ತಿಳಿಸಿದೆ.
FoF 2.0 ಅಡಿಯಲ್ಲಿ ಆಳವಾದ ತಂತ್ರಜ್ಞಾನ (ಡೀಪ್ಟೆಕ್), ತಂತ್ರಜ್ಞಾನ ಆಧಾರಿತ ಉತ್ಪಾದನೆ, ಕೃತಕ ಬುದ್ಧಿಮತ್ತೆ, ಜೈವಿಕ ತಂತ್ರಜ್ಞಾನ ಮುಂತಾದ ವಲಯಗಳಿಗೆ ಹೆಚ್ಚಿನ ಆದ್ಯತೆ ನೀಡಲಾಗುತ್ತದೆ. ಆರಂಭಿಕ ಹಂತದ ಉದ್ಯಮಗಳಿಗೆ ದೀರ್ಘಾವಧಿಯ ಹಾಗೂ ಹೆಚ್ಚಿನ ಅಪಾಯದ ಬಂಡವಾಳ ಲಭ್ಯವಾಗುವಂತೆ ಕ್ರಮ ಕೈಗೊಳ್ಳಲಾಗುತ್ತದೆ.
ಮೆಟ್ರೋ ನಗರಗಳ ಹೊರತಾಗಿಯೂ ದೇಶದ ವಿವಿಧ ಪ್ರದೇಶಗಳಲ್ಲಿ ಹೂಡಿಕೆ ಹರಿಸುವ ಮೂಲಕ ಸಮಗ್ರ ನವೀನತೆ ವೃದ್ಧಿಗೆ ಉತ್ತೇಜನ ನೀಡುವ ಉದ್ದೇಶ ಹೊಂದಿದೆ. ಜೊತೆಗೆ, ದೇಶೀಯ ಸಾಹಸೋದ್ಯಮ ಬಂಡವಾಳ ನೆಲೆಯನ್ನು ಬಲಪಡಿಸುವತ್ತವೂ ಗಮನ ಹರಿಸಲಾಗುತ್ತದೆ.
